意大利乙組球隊卡坦沙路官方宣佈，以有可買斷條款嘅借用方式從烏甸尼斯引入20歲 意大利進攻中場 柏芬迪（Simone Pafundi），據報導烏甸尼斯亦都有回購條款。
柏芬迪早喺16歲已經為文仙尼執教嘅意大利國家隊上陣，亦都喺2023年協助意大利取得 u20世青盃亞軍。不過一直嘅發展唔算太理想，目前累積喺意甲嘅上陣次數係19次，對上兩季亦都曾經被外借到瑞士嘅洛桑同意大利乙組球隊森多利亞。
卡坦沙路雖然對上一次喺意甲出現已經係1982/83球季，但係近年唔少意大利本土年青球員喺呢度得到唔錯嘅發展空間，包括已經轉會科莫嘅中場球員 列巴拿利、借用期滿回歸AC米蘭嘅中場施斯、目前仍在陣中且六月份有為意大利國家隊上陣嘅右後衛 法華蘇利同埋現役u21 國家隊中場艾利斯。
