陈滢JW爱恨分明怒掴“叛”侣 周嘉洛情人节讲实际
艺人陈滢、周嘉洛、朱敏瀚及JW（王灏儿）趁情人节自揭情史。陈滢曾发现男友出轨闺蜜而怒掴对方，嘉洛储钱打算与初恋女友“有福同享”却惨遭分手。JW坦言经历前段感情，日后会低调处理相关问题，而朱仔则继续拒谈陈晓华，力保爱苗！
陈滢、周嘉洛、朱敏瀚及JW主演的无綫剧集《痞子无间道》正在热播，4人拍摄第一辑时成为挚友，上辑开工时更经常被发现同车出入，收工又结伴叹早茶，令陈滢与嘉洛、朱仔与JW先后传出绯闻，幸未有影响友谊。今个情人节他们剖开心扉，大谈过往情路上的碰撞，想不到陈滢与JW不约而同曾遭背叛，反观两位男士却爱得相当理智。
谈到剧中的感情线，陈滢透露：“我个角色恋爱脑，千辛万苦放低同前夫嘅感情，竟然换嚟嘉洛话唔可以同我一齐，简直晴天霹雳，于是我连掴佢好多巴！”她又坦言现实生活中曾掌掴过另一半：“试过因为对方好醉，想佢快啲醒，而另一次经验仲差，发现对方同我闺蜜暧昧，系咪抵打呢？（最后点？）佢哋冇发展，个女仔嫁咗畀第二个，我同佢继续做朋友啰！”
身旁的JW大表认同：“男友出轨好容易发现㗎，女仔第六感好准！（你试过？）有经历啰，咁发现咗就一定冇得回头！”去年5月与前度叶韦彤分手曾引起争议，JW直言日后感情事会低调：“好惊呀，唔同新闻同声音都出现过，去到一个点仲要扭曲我意思，咁冇需要再同大家分享啦！（流言蜚语影响咗你哋？）又唔系，有一啲事发生啰！”
说到难忘情人节，两女均曾于求学时期获赠“惊喜”﹗陈滢说：“对方带我去停车场，砌咗心形蜡烛出嚟，最感动系温哥华当时好大风，蜡烛吹熄咗佢又点过，好花心机！出嚟做嘢后，好多时另一半都只系送花同朱古力，少咗啲浪漫。”JW则说：“有同学仔约我，一出门口就喺楼梯见到好多蜡烛，不过当时仲细，唔系好识畀反应。”
朱敏瀚坦言多人爱
而嘉洛与朱仔即相对的浪漫欠奉，嘉洛谈起初恋时笑说：“我储咗啲钱，谂住同女友出街挥霍，点知佢话分手，我咪攞啲钱买部电脑返屋企打机啰！情人节我讲求成本效益，正日所有嘢都贵，宁愿将买花嘅钱畀咗对方先，礼物日后再补。”而朱仔试过亲手整水晶球送给女友，又补充：“节日好讨厌，因为要还！佢送嘢畀我、我又要送番畀佢，不如平时送惊喜仲好，而且两个人感情好嘅话，礼物真系其次。（依家4个里面最幸福系你啦！）好多人爱我㗎！（同人哋首个情人节点庆祝？）咩呀？我约嘉洛佢哋做剧集宣传呀！”明显避谈绯闻女友陈晓华。而4人日前到主题乐园探望熊猫龙凤胎，又提议帮它们改名“猪猪”及“耷耷”。
