藝人宣萱今日(19日)出席店舖聖誕活動,她表示聖誕會跟朋友相約以指定Budget玩交換禮物,自己向來會選擇實用性禮物為主。問到有否收過「唔等使」的禮物?她表示:「冇喎,通常一大班人交換禮物會用抽獎形式,好好彩我抽親都係實用,或者係食物,超市禮券都有。」她表示今年聖誕會留港,除非要工作,否則正日會陪家人。
提到她順利入圍《2026年度叱咤樂壇流行榜頒獎典禮》的「叱咤樂壇我最喜愛的女歌手」獎項,問到是否預備出頒獎禮而留港?她笑言不是,更未有想過自己會入圍:「係朋友同我講投咗票支持。(驚訝入圍?)我覺得係好癲,對我嚟講已經係一個好美好嘅紀錄。(有信心入5強甚至攞獎?)唔諗啦!真係係好開心嘅,多謝Fans支持。」
問到會否跟入圍「叱咤樂壇我最喜愛的男歌手」獎的老闆古天樂一樣拉票?她笑言會感到尷尬,提到對方借她手指插鼻孔的黑圖來拉票,她笑言相片是自己拍,又睇好對方比自己大機會獲獎:「我唔係真係歌手,但佢有出碟開演唱會,我覺得佢已經係一個歌手,但我演唱會只係做嘉賓,又冇出碟。」提到對方利用她的黑圖拉票,宣萱笑指覺得幾搞笑,問她有否收藏對方黑圖?她笑謂:「黑圖?佢塊面都夠黑,哈哈!一企出嚟就已經係黑圖。」
她坦言沒有想過獎項,覺得純粹參與已很好玩,笑言若真的獲獎要上台唱歌會很緊張:「如果公司通知我入5強,我要搵老師上堂練歌,哈哈!」談到她也將為古天樂首個海外個人騷,到拉斯維加斯當嘉賓上台唱歌,宣萱坦言站於頒獎禮台上唱歌壓力大得多:「下面一班歌手望住你,你真係唔衰得㗎,人哋會笑你!」
提到視帝好友羅嘉良將為無綫台慶當表演嘉賓,獻唱其主演經典劇《難兄難弟》,並表示勾起了當年拍攝時的無數回憶,宣萱亦坦言《難》劇確實也勾起了自己不少回憶:「《難兄難弟》係一部經典,都差不多30年前的劇集,對我哋嚟講好多嘢只能夠回味,冇得返轉頭,所以每一個Project我哋都盡量Enjoy去做,就算30年後同一班人行返埋一齊去做同一件事,感覺都唔一樣,因為大家都有轉變,所以呢啲係一個美好回憶。」她表示無綫暫時未有斟她回去拍劇,坦言明白近年市道淡靜,劇集開拍也少了,拍劇事宜一切隨緣,又表示很久沒有跟羅嘉良碰面,不過大家一直有保持聯絡。另談到網民希望她能參演HOY處境劇《你的保安李寶安》,她表示尚未有人跟她接洽。



