【On.cc】劉愷威親證戀黎紀君十指緊扣放閃：我哋好夾

男星劉愷威近年甚少公開露面，近日佢有新相流出，同第7期藝員訓練班好友敍舊，被大讚回春狀態勁正，原來佢係有新戀情，新歡更係比自己年輕20歲、現年32歲Model黎紀君（Christy）。兩人因熱愛網球而擦出愛火，至今秘戀1個月。

東網詢問到劉愷威新戀情時，他謂：「多謝大家關心，我哋係打網球認識嘅，大家都有共同興趣，所以好夾，我哋都係簡單嘅人。」黎紀君亦甜爆回覆：「因為打波認識到對方，相處好自然同埋開心，多謝大家祝福❤️係網球，都係呢個月發生嘅事～」被問到男友經常不在港，異地戀會否好難維持？跟他囡囡有相處過嗎？有帶她一同玩嗎？黎紀君表示：「佢其實暫時都主要係香港，其他野我就唔回應住喇，希望界多啲空間我哋啦🤎」

劉愷威（左一）近日現身時，明顯回春。

原來係有個嫩口女友黎紀君。

兩人拍拖1個月。

黎紀君直認二人係今個月開始，愛得纏綿。

上周五（16日）上午11時許，劉愷威與身穿性感藍色貼身運動裝、白色短裙嘅黎紀君現身九龍灣，兩人全程十指緊扣，劉愷威更貼心地幫女友孭手袋，又不時咬耳仔氹女友開心。兩人與友人打完波後，就去到平民連鎖米線店搵食。席間二人頭貼頭研究餐牌，一碗米線兩份分，劉愷威又主動幫黎紀君夾餸，認真Sweet爆。餐後兩人告別友人登上男方座駕，於車廂內溫馨纏綿，黎紀君主動輕撫劉愷威下巴。隨後座駕直駛回女方西半山香閨，整夜未見離開。

然而，黎紀君其實剛於今年7月先回復單身，佢於社交網宣布與相戀6年嘅圈外外籍男友分手，二人共同飼養兩隻愛犬由黎紀君繼續飼養。黎紀君於限時動態上發文：「回歸一個人的生活，謝謝這六年的一切，是你讓我知道什麼是無條件的愛」黎紀君未有解釋二人分手原因，不過佢以「忠誠」二字暗指兩人之間冇第三者插足，寫道：「直到最後一刻，我們都用盡了全力，忠誠地去愛彼此，這樣就足夠了。」

劉愷威唔介意當街十指緊扣，仲分享同一碗米線。

黎紀君今年7月同拍拖6年男友分手。

黎紀君指二人「忠誠地去愛彼此」。

黎紀君同前男友和平分手。

劉愷威愛得大方。