【On.cc】張衞健恨生多啲頭髮　當BIG FOUR兄弟係「小天使」

藝人張衞健（Dicky）、伍富穚及林奕匡等晚上（5日）為慈善活動擔任表演嘉賓。向來善心爆棚的Dicky，表示只要覺得值得，即使到街上賣旗也可以，他認為每個人生命中都必定會遇上小天使幫助自己，只要拿出自己能付出的，不管是金錢、時間、天賦和技能去幫助別人，大家一樣會成為他人的小天使，他説：「大家如果用自己多咗少少嘅嘢出嚟去幫人，個世界會好美好！」問到他最多是那一樣？他搞笑自嘲説：「最多？不如講最恨會多咗嘅…頭髮啦梗係，哈哈！我到今時今日都係，有時見阿媽睇韓劇，見啲阿叔啲頭髮多到呢，好靚呀！」他又憶起20多歲時，在街上看見其他人頭髮濃密，會默默希望對方將頭髮讓給他，但現在已不會計較，覺得無論長甚麼外型，也是自己的一個獨特形象。

Dicky表示自己生命中也出現過很多小天使，例如Big Four的3位好兄弟許志安、蘇永康及梁漢文就是自己的小天使：「喺我不同時候，畀到我不同嘅鼓勵同幫助，但亦都係我嘅魔鬼嚟，引誘過我啲乜嘢就唔講啦，哈哈！」他指幾位兄弟經常邀他「唱K」，笑稱雖然自己也愛出街，但幾位兄弟都酒量好愛品酒，自己每次則只會點汽水、奶茶，坦言那些奶茶都太難喝。

提到許志安開騷在即，問會否為對方擔任嘉賓？Dicky説：「唔使啦，人哋都一票難求，有毛有翼得㗎啦，自己飛啦！（有留飛畀你？）留飛？佢梗係有啦，我要嘅飛Cut咗我一半，都叫有嘅，得啦！」看見老友10多年後再開騷，Dicky直言替對方高興，更認為對方可多開幾場，他笑言：「冇期啦，可能紅館同老闆都冇諗過佢咁好賣，下次開啟德…籃球場，哈哈！」他坦言自己也喜愛唱歌，但從來沒有開騷的夢想，會情願將籌備演唱會的時間放在度劇本，至於Talk Show就更加沒有考慮：「壓力太大，度劇本內容好笑、唔好笑都好大壓力，何況現場Talk Show要兜口兜面，唔好笑就尷尬。」他笑指即便自己入行紀念也是粉絲提他才記起日子，指自己對紀念日沒慨念，問他結婚周年可會忘記？他説：「Everyday is Valentine’s day！甚至我阿媽生日都唔記得。（太太生日都唔記？）梗係記得啦！唔係話錫老婆唔錫阿媽，問題係老婆生日唔記得？會崩盤㗎！」

張衞健嚟啦！

張衞健搞笑話恨生多啲頭髮。

張衞健同林奕匡合照。

林奕匡送心心。

BIG FOUR果然係好兄弟。