日本殿堂級Hello Kitty設計師山口裕子老師今晚（25日）現身會展《香港動漫電玩節2026》舉行簽名會，履行「蝴蝶結之約」，她表示會是最後一次以Hello Kitty設計師身份訪港，故吸引大批粉絲捧場，包括忠粉蔡思貝和女團IdG Sundae，成員Helen更早有準備用日語同老師打招呼。而思貝就落足心機在裝扮上，全身粉紅色以及束了兩個髮髻，還拿着代表「希望大家可以愛錫我」的公仔作展示。

蔡思貝表示由細鍾意到大都喜歡這個卡通公仔，是一見鍾情，屋企有一個櫃擺放了一系列的公仔和文具，其中一個公仔玻璃錢罌，在特別的日子便會投入硬幣作紀念，但從冇收過男仔送的公仔，自言可能因為情意結，所以特別喜歡蝴蝶結。她說從老師身上獲得啟發，希望做演員都能夠不停獲得新靈感賦予到自己。「好想做到演出嘅角色能夠跨越國界，成為大家集體回憶。」思貝有份主演的周星馳電影《功夫女足》票房節節上升，她開心表示：「今日18億人民幣（約20億港元），（做億萬票房女星？）多謝大家，係成個team功勞、周爺功勞，佢太厲害，希望可衝破30億、40億、50億更好。」自爆看了電影3次，每次感覺都不同，父母和朋友準備會包場支持。她說差利卓別靈有句說話，對於上一個作品，更加要諗點樣帶另一驚喜給大家，感覺這句說話好有重量。她說演員好似有種魔法，每個階段上天都會賜予不同的角色給她，現在有「孖八」角色，希望再有下一個驚喜帶給大家。周星馳早前宣布《功夫女足2》（Part 2）正式進入籌拍階段，思貝表示故事有好多隱喻，期待故事發展。

問電影帶挈她好多機會？她笑言最想角色帶給觀眾歡樂，「我收到好多留言，有人話好多年冇笑過，部戲令我笑出來，呢啲評價好珍貴，（有冇留意觀眾的差評？）我冇睇，因為我睇開致敬星爺，大數據就不停畀呢啲我睇，啲人好支持好熱血，如果有一日觀眾都咁支持自己作品我係會感動到喊。」透露早前接下另一部電影，9月出埠開工。

現時自己親自接洽工作關係，有傳她要陪笑冧老闆，她不禁苦笑：「想點啊！寫到我識飛都得！依家靠自己，與客人傾偈都是正常事，做嘢好正常。（唔開心？）做好自己先，知自己點處事做人，大家會有明亮眼睛。」早前傳出周星馳有意簽她旗下，思貝直認：「係傾緊，睇吓佢有冇誠意，哈哈！我好有誠意。（錢和工作邊樣先有誠意？）唔揀，乜都要。」