【娛樂新聞】馬國明首辦粉絲見面會 心痛粉絲追車：想安全互動 .視帝馬國明近日與老友蕭正楠、曹永廉遠赴馬來西亞開騷，三人以多套閃爆西裝載歌載舞，場面熱鬧。馬國明接受訪問時笑言：「好開心呀！一路跟住兩位大哥開騷唱歌，賺吓外快啦！」佢又話被兩位兄弟逼住練歌，雖然自嘲唱歌係Part Time，但已經唔會勁走音。演出期間佢落台同粉絲近距離接觸，大批熱情粉絲一擁而上，需要保安維持秩序，但馬國明全程保持暖男笑容，親和力爆燈。

馬國明將於下月8日在成都舉行首個粉絲見面會，佢話今次唔係演唱會，而係Fans聚會，希望每位粉絲都有個別互動時間，所以人數有限。佢坦言每次到內地工作，見到粉絲追車都好心痛，希望喺安全情況下接觸，如果反應好，不妨之後再開多一兩場。佢又話希望票價唔好太貴，因為對佢嚟講唔係搵食嘅嘢，純粹想同粉絲開心互動。馬國明首次舉行個人見面會，粉絲都相當期待。TVB