▪️西班牙輕取法國，繼2010年南非世界盃奪冠後相隔16年再度晉身決賽；法國力爭連續三屆入決實失敗。

近年「狂牛」殺入四強，好少球隊可以阻止佢哋奪冠，包括兩年前嘅法國，喺歐國盃都要俯首稱臣。迪尼（Lucas Digne）一時疏忽，禁區內解圍變踢人，俾耶瑪成功搏到12碼，再由奧耶沙巴（Mikel Oyarzabal）射入。呢一球改變咗戰局，加上沙列巴（William Saliba）傷出，兩個瞬間成為賽事最大嘅轉折點。越急越亂嘅法國58分鐘再失一球，終以兩球落敗，連續三屆殺入決賽夢碎。樸路（Pedro Porro）嘅入波配合同處理都非常好，佢個人喺今屆賽事亦已累積兩球進帳。

今仗一班大師兄到場觀戰，狂牛亦打出漂亮一仗，控傳及迫搶令法國毫無辦法，整體嘅默契同傳送，真係似足全盛嘅巴塞，任法國幾快幾落力都無計；最重要係防守出色，令對手到肉攻勢寥寥可數，當然古卻利拿（Marc Cucurella）亦值得一讚；守門員施蒙（Unai Simon）兩下嘅出擊變身做sweeper嘅時機都恰到好處，令佢哋至今依然係48隊之中失球最少嘅一隊。（呢下突然覺得殘陣嘅比利時能夠喺西班牙身上取得入波，兼且最後階段先輸波真係唔少嘢）

西班牙嘅部署亦勝一籌，中場尤其明顯，率先殺入決賽，絕對有說服力，睇埋聽晚就知對手係英格蘭定阿根廷啦。

準決賽賽事賽果-法國🇫🇷0-2 🇪🇸西班牙

世界杯FIFA World Cup 2026 🇺🇸🇨🇦🇲🇽Semi Finale法国球迷俱乐部西班牙球迷俱乐部