【On.cc】黎耀祥麥長青走訪自貢　與陳浩民《西遊記（貳）》Re-U

黎耀祥與麥長青（麥包）攜手主持的旅遊節目《江湖見》第二季，今晚（2日）及明晚中兩人將重點走訪四川有千年鹽都之稱的自貢，以及有「中國酒都」及「萬里長江第一城」之稱的宜賓，這兩集最特別的地方，是在1998年劇集《西遊記（貳）》中飾演大師兄孫悟空的陳浩民，將現身與師弟「豬八戒」黎耀祥及「沙僧」麥長青Re-U！

細說當年。

三人除齊齊品嘗宜賓馳名燃麵及白酒，兩人還陪陳浩民登山到訪翠屏山哪吒行宮，原來這三位師兄弟已經有整整二十年「冇坐埋一齊」，相隔多年重聚，自然有說不完的話題，單是想當年已講唔停，在劇中貴為大師兄的陳浩民，私下其實是小師弟，經常要向演戲前輩黎耀祥及麥包請教，他笑言當年就曾被黎耀祥的「背稿神功」折服：「佢老人家成日返嚟先睇（劇本），好有天分架」、「嗰日我問佢場戲應該點演，佢就話唔好問我住，我成兩頁紙對白，等我背咗先」、「我睇住佢背背背，跟住真係一口氣冇NG，全部講晒！」

陳浩民笑言當年已睇好黎耀祥攞視帝，但卻因「口誤」鬧出笑位：「嗰時我都話，你一定會攞影帝，佢（指黎耀祥）成日都好懷疑自己」，祥哥聞言即回應：「唔係～我攞視帝啫！」三人笑完一輪後，陳浩民續說：「睇住佢攞視帝嗰日，我真係好開心。」說畢還佻皮地「攻擊」麥包：「我唔係逢人都講話攞視帝（指向麥包），你有冇見我同佢講吖！」 談到《西遊記》，自然想起第一代孫悟空張衞健，黎耀祥一針見血問陳浩民當年接捧健仔心情，陳浩民亦大方回應：「我當時係：『唔係呀嘛，個天對我咁好嘅？』」並指試鏡當日一嚟便被叫去化妝間：「到咗之後有個盒喺度，一打開就係孫悟空個頭套。」

陳浩民又坦言當時有感自己屬於空降性質，感到既尷尬又有壓力：「因為好爭議架，做咩會搵個咁新嘅人嚟代（健仔），同埋上一部係收視全年冠軍嘅電視劇。」麥包聞言亦幫口：「拍嘅時候，有啲導演都會要求佢做番健仔樣嘢。」陳浩民續說：「因為有個標杆、有把尺喺度量我，因為覺得咁觀眾先會接受。」黎耀祥聞言亦感嘆：「係掙扎嘅，到底跟佢做一套，定自己諗呢？」陳浩民聞言再感嘆：「唔好話跟佢吖，點會跟到呀，以我當時嘅資歷。」雖然陳浩民對於當年自己的表現盡是負評，但黎耀祥及麥包卻連番出言安慰。

除了嘉賓訪談環節，今集兩人還在自貢親身體驗了完整的採鹽過程，期間兩人更拎起大大把鑊鏟鏟鹽鬥大力！又先後到訪了南華宮及李莊古鎮，在南華宮中，二人一嘗古代老闆滋味，坐在VVVIP位置欣賞川劇，更以極近距離與變臉高手「切磋」，黎耀祥被對方的精彩演出震撼到連番拍手叫好。

暢談往事。

麥包和陳浩民相當老友。

真係好經典。