主辦國之一嘅美國尋日喺第二場分組賽以2-0輕取澳大利亞，係自1930年以來再次兩戰兩勝，提早出線，有冇人又收美國佬錢就唔知，不過今場焦點就落在球證身上。

可能因為近日西雅圖熱浪來襲，球員攰球證都攰，所以去到完場前就見到球證芝華耶（Felix Zwayer）抽筋，要球員幫手拉筋，都算係非常罕見。

呢位球證之前醜聞多多，試過打假波停賽半年，執法德甲又不斷受人抨擊，但依然受國際足協重用，仲試過吹歐霸盃決賽。幸好今次只係抽筋，球迷最多笑兩聲就冇事。

美國有主場之利，又有普捷天奴執好隊波，記得上年試陣就被唔少傳媒抨擊，但頭兩場踢落又唔錯，只係對手級數未算頂尖，先備忘。

值得一提係今仗為美國先開紀錄嘅費文（Alex Freeman），老竇都係玩football，不過係美式足球，效力綠灣包裝者時仲贏過超級碗；今日佢都有入場睇波，當記者問到，佢話完全唔識球例，但反而係好事。「一樣咁刺激，我幫佢打氣，專心做fans，而且唔識點批評，咁仲可以維持良好父子關係。」記證愛兒入波兼幫助球隊出線，都算係提早收父親節大禮。

文章內容擇自- 仙道彬手記（今次唔講籃球）