睇咗土耳其守門員烏古簡卡卻（Uğurcan Çakır）嘅兩個失波，即刻唸起已故球王馬勒當拿同英格蘭射手夏利卡尼當年嘅對話「不如嘗試下內切後射多d近柱位…」

上半場伊蘭昆達（Nestory Irankunda），下半場嘅干諾密卡菲（Connor Metcalfe），都係「攞近柱」位置得分，睇來烏古簡卡卻喺應付近柱埋門嘅企位同撲救，需要好好修正一下。澳大利亞習慣被睇淡，但係絕對不容忽視。今仗領隊普波域（Tony Popovic）祭出541嘅鐵桶陣，頗有九十年代捷克嘅味道，而賽果亦都證明佢嘅應對策略非常成功。尤其係喺兩個邊路嘅快速反擊對土耳其後防線速率嘅優勢，將對方嘅弱點無限放大。

至於土耳其嘅4231陣式，無論耶瑪斯（Baris Alper Yilmaz）、艾達居拿（Arda Güler），抑或後備入替嘅耶迪斯（Kenan Yıldız），都係較喜歡由邊「收中」內切埋門，尤以居拿嘗試起腳次數最多，可惜8次射門只有3次中目標。教練蒙迪拿賜予嘅無限開火權是否合適係其中一個值得商榷嘅問題。國際米蘭中場查漢奴古（Hakan Çalhanoğlu）退後一格踢MC，更多嘅角色功能係負責組織派牌，多少都削弱咗佢嘅埋門威脅能力。尤錫（Ismail Yüksek）喺30分鐘嘅遠射中柱，應該係佢哋全場最具威脅嘅一次。而一對邊閘卡迪奧古（Ferdi Kadıoğlu）同薛歷（Zeki Çelik）應付澳大利亞嘅邊路衝擊顯得相當吃力，尤其係右閘嘅薛歷。

世界盃分組賽賽事賽果-Group D美國🇺🇸4-1 🇵🇾巴拉圭澳大利亞🇦🇺2-0 🇹🇷土耳其

*另附上A到D組首輪分組賽後積分排名情況。

FIFA World Cup 2026 🇺🇸🇨🇦🇲🇽世界盃分組賽澳大利亞2-0 土耳其