模範律師團丨陳煒驚喜首度與羅嘉良合作 張曦雯喪食反瘦冇刻意減肥. 陳煒與張曦雯（Kelly）今日（14日）在深圳出席新劇《模範律師團》開鏡拜神儀式。陳煒透露，新劇中嘅角色正係《正義女神》中「高淑樺」八年前嘅故事，會聚焦佢同囝囝嘅母子情，解釋個仔點解會成魔。佢同羅嘉良（撈家）飾演師兄妹，兩人關係會由好轉差。陳煒話好開心可以同撈家合作：「我同佢係同代演員，但一直冇機會合作，冇諗過咁多年後可以合作。至於茜堯，我喺無綫第一套劇《法網狙擊》已經同佢同劇，但冇對手戲，今次算係第一次正式合作。」佢透露劇中有大量法庭對白，要努力背熟，實行輸人唔輸陣。

Kelly今朝6點已經拍咗兩場戲，非常順利。現場見佢瘦咗唔少，但佢話冇刻意減肥：「我好努力食嘢，每次返大陸拍劇都會肥咗，因為叫外賣太方便。」講到角色，Kelly自言自己最不受大家歡迎，因為成日搞事。劇中佢飾演撈家嘅徒弟，佢揚言劇裏劇外對方都係自己師傅：「今次係第一次同佢合作，尋晚一齊食咗餐飯，佢比我想像中風趣幽默，我見到佢面即刻叫佢師傅，多多指教。」TVB