倪樂琳首拍劇着空姐制服被誤認「真空姐」 興奮圓夢：一直覺得套衫好靚

無綫新劇《飛常日誌 II》將於下周一（15日）晚首播，除咗上輯原班人馬馬國明、高海寧、劉穎鏇、朱敏瀚、洪永城等回歸，今輯仲加入多位小花，包括2024年港姐冠軍倪樂琳、2021年港姐亞軍梁凱晴，以及鍾柔美、盧映彤、李芷晴、莊易羚、李海銅等，陣容養眼，全員鬥索。

劇中倪樂琳同梁凱晴飾演港灣航空地勤人員，兩人穿上空姐制服配黑絲，加上燦爛笑容，亮麗十足。鍾柔美則飾演機場見習行政人員，粉色衫配短裙，甜美造型散發青春活力。

今次係倪樂琳首次參與劇集拍攝，佢接受tvb獨家訪問時話，當初收到入組通知感到非常興奮：「嗰時啱啱卸任港姐，都有啲迷惘，唔知道要做啲咩，而我一直都好想拍劇，所以收到可以喺《飛常II》演空姐真係好開心。」佢自言一直覺得空姐制服好靚，並大爆拍攝期間曾經被誤會係「真空姐」：「嗰時有好多旅客以為我係空姐，佢哋會走嚟搵我幫佢check in，又問我登機閘口喺邊，我覺得好搞笑，睇嚟我都幾襯呢件空姐衫。」倪樂琳仲喺社交網分享咗唔少花絮相，隔住Mon都感受到佢首次拍劇嘅雀躍心情。TVB