港姐面試︱溫思婷搣面篤鼻證堅嘢 吳倬希「撞名」得歡心. 《2026香港小姐競選》日前進行第二輪面試，新增泳裝直播環節，47位佳麗換上泳裝見評判。大部分參賽者廣東話欠佳，場面搞笑。其中來自深圳、有「翻版古佩玲」之稱嘅百萬網紅溫思婷，身穿黑白泳裝，但廣東話出晒位，努力將每粒字說清楚，反而似美女機械人。監製姜偉叮囑佢要咬字準啲，樂易玲亦留意到佢社交網有大量泳裝照，溫思婷解釋只係旅遊相。前晚面試完畢，溫思婷喺電視城門外被問到整容傳聞，即時搣面珠話「冇啊！都係真㗎！」，仲叫身旁嘅陳雨薇篤佢鼻驗證「真材實料」。佢話會努力學廣東話，又話最愛港式奶茶同三文治。

另一位參賽者吳倬希，因為名字同藝人吳卓羲同音，樂易玲笑話「我記得佢個名好好記，非常之親切，『吳卓羲』！」主持陳懿德問佢識唔識唱吳卓羲名曲《別怪她》，吳倬希笑話聽過但唔係好識唱。佢精通六種語言，包括西班牙文、韓文、法文等，仲係八級鋼琴高手，條件出眾。

其他佳麗方面，21歲英國返港嘅胡藹嵐聽唔明評判發問，索性問樂易玲「可唔可以講英文？」，被網民大讚夠率直夠膽量。石馨營被指大腿粗、手臂似打拳，佢話已努力減掉4.5磅，希望早日變「輕型」。劉爾穎首輪被視為大熱，但第二輪未有現身，有傳佢睇過無綫合約後覺得唔適合而婉拒，劉爾穎澄清話從未睇過合約，亦冇收到第二輪面試電話，可能首輪表現太緊張，明年唔會再戰，會專注自己工作。TVB