宋宛穎與雙胞胎妹妹同慶27歲生日 晒童年照證由細靚到大. 前港姐冠軍宋宛穎（Sabrina）於昨日（6月8日）迎來27歲生日，佢喺社交平台晒出一輯慶生靚相，並留言：「生日很快樂，願我愛的，和愛我的，都快快樂樂，永遠幸福。HBD to meeee. 」相中，頭戴粉紅色生日帽嘅宋宛穎著住波點掛頸低胸背心，大晒深長事業線及白滑肌膚，性感度爆燈！佢又一邊捧住寫上佢英文名「Sabrina」嘅蛋糕，一邊對鏡頭放電，迷倒唔少網民！

除咗單人靚相外，宋宛穎仲晒出與雙胞胎妹妹Sonia一同慶生嘅合照，以及童年嘅照片，可見兩姊妹由細靚到大，二人一齊捧住精緻嘅小熊生日蛋糕，並雙雙閉上雙眼許願，畫面非常有愛！唔少網民都紛紛為二人送上生日祝福，又留言大讚：「兩姊妹都咁靚」、「細個版嘅Sabrina同妹妹巧靚靚呀」、「基因太強大了！」