黃百鳴內幕交易罪成判囚5個月 申上訴期間保釋獲批. 天馬影視前主席、80歲嘅黃百鳴（原名黃栢鳴）涉於2017年慫使胞妹購入公司股票，被裁定內幕交易罪成，今日（9日）喺西九龍裁判法院判刑。裁判官高偉雄指，雖然被告對電影業有非凡貢獻，涉案金額唔算龐大，但犯案影響公眾對香港證券市場嘅信心，判其監禁5個月，並須繳罰款逾9.9萬港元，以及向證監會支付調查費37.4萬港元。辯方為黃申請上訴期間保釋獲批，裁判官准許被告繼續以20萬元擔保。

案情指，2017年8月至10月期間，黃百鳴喺洽售天馬影視股份期間，分數次轉帳共200萬港元予胞妹黃潔珍，並透過WhatsApp指示佢「明天低過0.2，盡買」等，胞妹其後買入總值約160萬港元股份。辯方求情時指事件令黃百鳴名譽喪失，冀法庭考慮佢年事已高、無機會重犯，判非監禁刑罰，但最終仍要入獄。