陳法拉晒與茱迪科士打合照 感恩偶像影響自己追尋導演夢. 44歲前TVB花旦陳法拉近年專注喺荷里活發展，仲開始涉獵幕後工作，演而優則導。2019年，佢首度自導自演嘅短片《人來人往》獲選為「辛丹斯電影節：香港短片比賽」9部得獎短片之一。早前佢再完成第二套自編自導嘅短片作品。

近日，陳法拉喺美國紐約出席「Tribeca電影節」期間，參加咗一個品牌舉辦嘅「Through Her Lens」主題午宴，仲晒出同奧斯卡影后、資深導演茱迪科士打（Jodie Foster）嘅合照。陳法拉喺社交平台留言，話好慶幸能夠同一班女性電影人聚首一堂，當中包括佢嘅「人生偶像」茱迪科士打。佢以「My hero」形容對方，仲把握機會向偶像傾訴心聲，多謝對方深深影響自己，令佢堅定追尋導演夢，亦教會佢喺創作路上保持無畏嘅勇氣，同時唔忘待人溫柔善良。呢段真摯嘅分享，獲得唔少網民留言讚好，支持佢繼續喺導演路上發光發亮。