陳煒發揚潮州女性美德 享受服侍老公愛獨力做家務. 第五屆「香港潮州節」名人紅星閃耀登場，昨日（5月7日）凍齡女神陳煒（煒哥）亮麗現身「潮煮」活動，接受香港潮屬社團總會副主席兼第五屆「香港潮州節」籌委會主席楊玳詩訪問。身為普寧人嘅煒哥，自言擁有潮州女性嘅優良傳統，如勤力、孝順、賢良淑德等，即使忙於拍劇，仍堅持打理家務。煒哥甜笑話：「男主外是應該的，雖然好多女人都要返工，但男人都好辛苦，所以要侍候得老公開心、舒服。」

兩公婆分擔家務，都可以係一種生活情趣，但煒哥就唔太認同：「我覺得自己一個做家務開心啲，假手於人唔太安樂，我冇潔癖，只係自己一手一腳更清楚。」呢位絕世好老婆話，老公間中會幫手掉垃圾等，已經好足夠。

煒哥唔只愛做家務，仲精於下廚，最愛煮潮州蠔仔粥，老公都讚不絕口。佢笑言：「因為快捷又好味，我做嘅係改良版，一般蠔仔粥嘅湯底會用大地魚，加冬菜提味，我仲鍾意切碎金華火腿，再烘熱，最後加落蠔仔粥，有種鹹鮮香味。」首次嚟到「香港潮州節」，煒哥坦言大開眼界：「我覺得比一般美食展更有特色，不但有好多好食嘅嘢，現場仲有潮劇、廟宇等潮州文化嘅介紹，每個攤位都用心裝修，好吸引！」

煒哥即將參演新劇《模範律師團》（《正義女神》前傳），愛食嘅佢笑言要忍口：「因為係前傳，角色比之前年輕，戲服都偏向窄身，所以要更加努力keep fit！」闊別無綫十年嘅視帝羅嘉良落實回歸，喺新劇化身殿堂級大狀，將與煒哥飾演嘅刑事天后有一番惡鬥，開工前兩人「先禮後兵」。煒哥笑言：「我同嘉良都以為合作過，但原來只係曾經喺登台時遇見，十幾年前亦都拍過合照。上個星期我哋已經食過飯，佢好親切友善，我十分期待，相信會合作愉快！」