《城寨英雄》主角10年後Re U 拳佬牙佬貓仔刁蘭同場掀回憶殺. 胡曦文男友羅御軒近日公開一張同《城寨英雄》幾位主演——陳展鵬、袁偉豪、伍允龍同胡定欣嘅合照，仲寫道：「特別時刻－與《城寨英雄》劇組重聚。感謝這段旅程、這份友誼，以及這部感動了香港乃至世界各地無數觀眾的劇集所留下的寶貴遺產。」

2016年推出嘅《城寨英雄》轉眼已經10年，係當年收視冠軍，大結局最高收視一度飆升至35.2點。故事講述50年代城寨人物喺黑幫為患下嘅苦況，以及臥虎藏龍嘅升斗市民奮起反擊。除咗武功高強嘅主角同連串精彩動作場面，其他演員嘅演出一樣亮眼，令劇集口碑收視俱佳。

合照中見到「拳佬」陳展鵬、「牙佬」袁偉豪、「貓仔」伍允龍同「刁蘭」胡定欣同時現身，各人相隔多年，劇情依然歷歷在目。當年嘅CP早已分別成家：陳展鵬同單文柔2018年結婚，育有「小豬比」；胡定欣去年同醫生陳健華結婚；袁偉豪亦已成為兩子之父，同張寶兒一家四口幸福生活；至於「貓仔」伍允龍之後再喺電影《九龍城寨之圍城》飾演「王九」，兇狠善打，同另一半李蔓瑩亦非常甜蜜。TVB