香港探秘地圖｜倪嘉雯一秒變臉爆出第二人格 打女「Sa姐」現身狂打王致狄. 《香港探秘地圖》今晚（8日）一集，倪嘉雯飾演嘅秀儀爆出第二人格，化身打女「Sa姐」狂打王致狄飾演嘅Rocky。劇情講述畢鳴（孔德賢飾）同文彬（丁子朗飾）為咗查出秀儀腋下疤痕嘅真相，呃Rocky話佢哋都俾秀儀打過，誘使Rocky講出被打經過。Rocky話喺酒吧見到秀儀獨自飲酒，上前撩佢仲帶佢去後巷，點知秀儀突然變臉自稱「Sa姐」，對佢拳打腳踢，仲拎鐵通打到佢一身傷，Rocky最後用玻璃碎反擊先走得甩。Rocky仲話「當時Sa姐俾我錫咗一啖，好似變咗另一個人咁」，令畢鳴同文彬大感驚訝。

其後，一臣（黎耀祥飾）向畢萍（龔嘉欣飾）透露見過Sa姐喺後巷打Rocky，Sa姐話因為對方想鹹豬手秀儀，所以打傷佢，仲話之前國豪落藥意圖不軌，同樣抵打，咁做係唔想秀儀受到傷害。當一臣勸Sa姐唔好咁偏激，話唔係個個男人都係壞人時，Sa姐即揮拳打到一臣流鼻血，仲話「全部男人都係垃圾」，警告一臣唔好講佢嘅存在，否則同Rocky下場一樣。網民大讚倪嘉雯將兩個人格演得分明，留言「真係唔可以激嬲Sa姐」、「Sa姐好有型」。TVB