孫慧雪為大仔Riley慶祝9歲生日 包場齊玩VR遊戲

. 43歲嘅孫慧雪（雪雪）2016年與「富二代」羅天彥（Edwin Lo）結婚，婚後先後誕下兩子，一家四口幸福美滿。雪雪雖然工作忙碌，但身為「廿四孝媽媽」嘅佢一有時間就會陪囝囝周圍去，對囝囝嘅生日亦非常上心。繼去年為大仔Riley大搞「魷魚遊戲」主題派對後，今年佢就包場大玩新潮VR遊戲慶祝。

雪雪喺IG晒出為Riley慶祝9歲生日嘅照片，並透露雖然囝囝生日係喺7月，但每年都會提早一個月慶祝嘅原因：「啱啱完成咗Riley哥哥9歲嘅生日party，其實佢7月先9歲，不過我哋每年都會同佢提早一個月，同佢搞個同同學仔慶祝嘅生日party！因為佢哋6月中就放暑假啦～所以7月份會再約佢校外嘅朋友仔！」

雪雪坦言去年籌備「魷魚遊戲」主題派對非常辛苦，所以今年就選擇搞VR派對，但又擔心小朋友年紀仲細，會被VR超真實嘅畫面嚇親：「好彩大家都好大膽，我哋嗰隊仲要玩埋stranger things（《怪奇物語》），阿媽我真係好攰，一如既往，啲嘢都係我媽媽呢邊book晒，爸爸係嚟出席。」

除咗有好玩嘅活動，派對嘅食物同蛋糕都極具心思。雪雪精心準備咗高質素嘅韓式到會，大人小朋友都食得津津有味。而生日蛋糕更投囝囝所好，準備咗以人氣手機遊戲《Brawl Stars》（荒野亂鬥）為主題嘅生日蛋糕，成品非常精緻。

最後，雪雪多謝各位同學仔同爸爸媽媽參與，亦多謝大家嘅禮物。壽星仔Riley喺派對後更甜絲絲地向佢致謝，令佢非常欣慰：「Riley夜晚同我講：『媽媽，今日好開心呀！Thank you媽媽！』佢真係大個仔啦！所以下年自己約人啦。」