吳大強未與TMG續約澄清與工作量無關 暫別樂壇多陪家人旅遊. 吳大強今日（8日）喺灣仔會展「香港潮州節」活動上表演，前警務處處長蕭澤頤到場支持。身為潮州人嘅佢呢幾日喺潮州節活動中品嚐咗好多潮州美食，小時候嘅生活情景彷彿重現眼前。問到潮州人管教仔女係咪好惡，佢笑話呢啲都係以往嘅觀念，自己對幾個仔女唔會惡，時代進步咗，亦曾同仔仔們一齊到潮州汕頭尋根。

上個月頭有網民發現吳大強嘅名字喺TMG官網同TVB藝人官網消失，有人猜測佢已經離巢。吳大強笑指只係人家睇漏眼，自己仍然留喺TVB，同公司商討後決定唔續約TMG，想留多啲時間同家人旅遊。佢話：「主要係我想休息一下，唱咗幾年都差唔多，想抽時間陪伴家人，覺得到此為止；個心仍然喺娛樂圈中，睇吓公司有冇其他部門適合我。」佢澄清唔係公司唔同佢續約，同公司關係好好，大家傾咗好耐，係佢自己想休息，因為若然唱片公司安排咗工作，佢都唔可以推。問到係咪早前工作量太大而吃不消，佢話：「與此無關，只係合約到期，想同家人四處旅遊。」佢表示正等待公司俾機會，安排拍劇，透露之前拍咗一套劇仍未播出。

此外，兒子吳偉豪有份演出嘅《愛·回家之開心速遞》將會停拍，吳大強話冇擔心。問到吳偉豪有冇同佢傾過劇集停拍一事，佢話冇，自己都係睇報紙先知，好少過問仔仔拍劇工作。佢唔擔心吳偉豪，期待睇佢有份演出嘅新劇《飛常日誌II》，透露每當仔仔有新劇播出，都會一家人一齊睇嚟支持。TVB