《給阿嬤的情書》內地破15億票房 陳欣健許冠文激讚：一定有真情. 電影《給阿嬤的情書》以僑批為敘事線索，講述潮汕阿嬤嘅孫子遠赴泰國尋找阿公嘅故事，喺內地已經突破15億票房，大受歡迎。今日（7日）許冠文同陳欣健兩位殿堂級電影人出席《香港潮州節》活動，席間同楊玳詩談起呢套戲時都讚不絕口。

陳欣健話：「我喺廣州睇，我認為呢套戲非常之傑出。因為全部都係潮州對白，全部演員都好新，冇古天樂——你好難搵到一套戲冇古天樂，你知？但係套戲講以前我哋啲先輩點樣去東南亞地方，點樣失咗聯絡，點樣再建立返友誼。我好感動。乜都好，十幾億票房冇可能唔好。」

許冠文就話，雖然自己未睇呢套戲，但係相信好嘅作品一定有幾個條件：「一，好真情，所以描寫關係都係好真。第二，個阿嬤一定係非常感人，唔係作出嚟，真到完全唔配音，由頭到尾都係講潮州話。你諗吓收咁多錢，冇人志在有冇明星，冇人志在講咩話，所以能夠咁賣座，一定有呢啲因素。電影好唔好，得一個因素——要有真情，有意思得嚟有情，感染到人。」