龔嘉欣未試過被前輩教戲 反會主動請教：我冇資格教後輩. 龔嘉欣昨日（6日）出席劇集《香港探秘地圖》宣傳活動，對於近日圈中熱議「前輩教後輩做戲」的話題，佢接受訪問時表示自己從未遇過被前輩教導嘅情況：「我又冇喎，反而係自己會主動去請教前輩。」佢話自己仲係新人嘅時候，會自動自覺去請教前輩意見：「因為始終人哋嘅經驗係豐富好多好多。」

至於會唔會教導後輩，龔嘉欣形容自己冇資格：「我冇資格，我冇資格！我唔會㗎，有時我覺得我自己入行咁耐，做每一個戲、每一個角色嘅時候都會有一個壓力喺度，好專注、好專心咁做好自己嘅工作先。」佢話平時見到同劇演員，可能會喺細節上幫手，例如頭髮亂咗就幫手整理，衣服未拉好就幫佢哋拉好：「我哋面對面做對手戲嘅時候，就會最清楚，有時見到亂咗嘅，咪幫手大家睇下囉。」TVB