鄭俊弘被何雁詩爆當年不知自己係第三者 否認同老婆有爭執. 歌手鄭俊弘（Fred）昨日（6日）現身TVB公益金活動，接受《香港01》訪問時坦誠自己正式離開效力24年嘅無綫電視，以自由身姿態重返電視城。面對舊同事同傳媒，鄭俊弘坦言心情百感交集，但跳出舒適圈嘅最大動力，全因為老婆何雁詩（Stephanie）同患有罕見病「天使綜合症」嘅寶貝仔Asher。

鄭俊弘中學畢業後就加入TVB，將24年青春奉獻畀公司。佢話想「趁仲有力」出去闖一闖，睇吓個世界係點，但未知去向，會唔會做獨立歌手或簽約唱片公司，佢笑話「自由身吓先啦」。

早前何雁詩喺節目中自爆當年並唔知道自己係第三者，如果知道就唔會同Fred一齊。外界猜測二人因吵架而分歧，但Fred受訪時笑言：「其實呢件事都發生咗咁耐，我覺得最緊要係我哋要照顧好阿仔，呢個係我哋嘅重任，所以其他嘢我都唔多提。」佢否認有「家庭糾紛」，至於有冇事先同老婆傾過，佢話「唔回應」。

患有天使綜合症嘅Asher將會去加拿大接受治療，Fred話嗰邊治療對仔仔比較好，所以會盡量配合。為咗多啲時間陪仔仔，佢決定離開TVB，未來工作安排「一切以兒子為先」，首選係編排喺加拿大嘅治療時間表，其次先係自己工作。TVB