中年好聲音4｜尹景順迷失歌詞意外唱出高分 告別「色水」回歸初心連續3次93分. 《中年好聲音4》今晚（7日）播出「安歌之夜」上半場，有「東方不敗」之稱嘅尹景順獻唱許志安經典金曲《半天假》，獲評判激讚告別「色水」（指花巧嘢），唱出真我，連續第三次豪奪93分！尹景順嘅絲滑假音與低音吉他和諧配合，高音紮實穿透力強，令人聽出耳油。一曲完結，佢自爆其實迷失喺《半天假》嘅歌詞中：「唔知自己做緊啲咩」，但正正係佢拋開雜念、唔刻意修飾嘅演唱，反而將最純粹嘅一面傳遞畀觀眾，做到「人歌合一」，引起強烈共鳴。

評審張佳添激讚聽得好爽：「景順平時唱歌好多鬼鬼怪怪嘢、整色整水，佢今日係正正經經唱一首歌。正經嘅意思唔係話唱得悶或者保守，而係你真係將一首好好聽嘅流行曲嘅旋律帶到一個好靚嘅境地，你嘅聲音辨識度喺呢首歌入面完全發揮晒！」嘉賓評審許志安亦話尹景順把聲極具畫面感；知音人查小欣同樣毫不吝嗇誇讚：「現場冇得頂，等於首歌一樣，我真係放咗半天假！」形象顧問兼歌手馬天佑更細心發現，尹景順今日嘅灰白造型，竟然同許志安《相信愛》專輯封面似到十足，連周國豐都忍唔住感嘆：「好勁喎！」尹景順憑住呢份回歸初心嘅演繹，連續三次獲得93分佳績，成為今場焦點。TVB