胡楓演唱會｜陳奕迅驚喜登場 契仔張家輝張學友擺羅蘭緋聞上枱. 94歲嘅胡楓（修哥）今日（7日）喺紅磡體育館舉行《修哥九五至尊無限楓騷演唱會》，現場星光熠熠，嘉賓陣容包括楊千嬅、Big Four、草蜢、羅嘉良、陳奕迅、張家輝、陳松伶、莫文蔚同汪明荃等，被網民形容為「史無前例嘅夢幻拼盤演唱會」。

莫文蔚擔任特邀表演嘉賓，獻唱《月亮代表我的心》同《呼吸有害》，恭賀修哥破紀錄。修哥即場送花同唱生日歌俾6月生日嘅Karen，令佢感動又開心。

全晚高潮係陳奕迅（Eason）突然驚喜現身，同舞蹈員唱出《舊歡如夢》，仲搞笑錫咗修哥面珠一啖。Eason分享當年做新人時，喺化妝間第一次見修哥，對方竟然主動問佢有冇嘢可以做，令佢銘記至今：「呢個前輩真係好鍾意做嘢，先會放低身段同後輩自薦合作。」Eason仲唱出當年參加修哥70歲演唱會時嘅《Shall We Talk》，全場掌聲雷動。原來佢現身係一個大驚喜，修哥本身唔知，Eason笑言「綵排我都冇綵，要好秘密」。

契仔張家輝拖住修哥合唱《分分鐘需要你》，期間輕鬆調侃修哥同羅蘭嘅「感情秘事」：「你可唔可以喺咁多觀眾面前表白你同羅蘭姐收得好耐嗰段感情？」又話見到兩人「打車輪」嘅相，修哥氣定神閒話：「你知唔知而家有AI？」張家輝繼續笑：「唔係喎，你條脷伸咗過去喎！」修哥回話：「係咩？AI都有脷㗎！」

另一位契仔張學友上台唱《不老的傳說》，形容首歌最適合修哥。「兩父子」不停互窒，學友爆出一句「701服務公司」（羅蘭姐當年喺《歡樂今宵》嘅經典角色），暗示修哥同羅蘭姐好熟。張家輝再加把口：「係呀！伸咗條脷去人哋度呀！」學友笑言：「我話晒佢阿哥嚟㗎嘛，尊卑有別。」三人開完玩笑後，再合唱《還是覺得你最好》。修哥以94歲高齡完成創舉，成為全球最年長開騷嘅華語藝人，獲頒健力士世界紀錄，場面感人。