中年好聲音4｜許雲妮「沙膽」清唱開場征服全場 周志康許美琪卓猷燕跌入待定區. 《中年好聲音4》今晚（7日）播出「安歌之夜」上半場，出場歌手及歌單包括：周志康《一步一生》、陳旭培《我的天 我的歌》、許雲妮《愛你》、許美琪《星河感覺》、卓猷燕《世紀末煙花》、尹景順《半天假》、蔡宓婕《爛泥》。

許雲妮一開口就喺冇伴奏嘅情況下先聲奪人，以招牌沙聲唱出《愛你》第一句，扣人心弦，被形容為「神級開場」。隨住歌曲不斷升Key，雲妮嘅情緒層層遞進，最後將整首歌推向高潮，行雲流水嘅演繹征服全場，最終斬獲91分。張佳添大讚許雲妮唱出自己嘅味道，異軍突起成為新威脅：「許雲妮呢3個字已經慢慢成為一股好有威脅性嘅勢力，對於所有參賽者都係一個威脅！」許志安亦話被歌曲開頭擊中，有「屏息靜氣」嘅感覺。

今集最低分嘅三位參賽者——周志康、「喊包琪」許美琪及卓猷燕——齊齊跌入待定區。周志康選唱《一步一生》，雖然張佳添讚佢「中音好靚」，但成首歌嘅層次遞進感略嫌不足，許志安同肥媽都覺得志康信心唔夠，到後半段先唱出水準。許美琪唱《星河感覺》，真假音轉換非常出色，但許志安坦言佢未能唱出歌曲中既開心又帶點淒慘嘅感覺。海兒話美琪嘅高音太用力，張佳添就嫌佢演唱初段有少少木獨，未能投入歌曲氣氛，到後半段先發揮應有水準。卓猷燕一開聲唱《世紀末煙花》已經甩Beat，台下嘅肥媽肉緊地為佢打拍子。海兒直指猷燕唱歌時太肉緊同太多大動作，同首歌格格不入；周國豐則話猷燕嘅咬字有問題。TVB