袁文傑憶述讀訓練班時期被「好演技演員」勸退：你有冇諗過轉行？. 憑無綫處境劇《愛·回家之開心速遞》「潮偉」一角深入民心嘅袁文傑，青靚白淨兼有1米9傲人身高，每次出場都自帶霸道總裁氣場。原來風光背後，佢初入行時都曾遭遇過殘酷嘅職場「欺凌」。尋日（6日）袁文傑出席劇集《香港探秘地圖》宣傳活動後接受訪問，罕有剖白30年前喺舊公司被前輩「狠批」嘅辛酸史。

娛樂圈向來「跟紅頂白」，新人捱鬧似乎係家常便飯。但對於當年滿腔熱誠入行嘅袁文傑嚟講，有啲說話真係痛入心扉。佢重提一段30幾年前嘅往事，當年佢仲讀緊訓練班，但因為身高問題而被前輩潑冷水：「我好記得嗰陣時我都已經係咁高，嗰陣有位演技頗為出色嘅師兄，有一日我哋出去外景拍攝，嗰陣我仲係訓練班。佢話：『喂！你咁高，你有冇諗過轉行啊？你咁高其實都冇嘢啱你做同搵你做㗎啦，你諗下其他行業啦。』講完就走咗去。嗰陣我仲係訓練班，戰戰兢兢，俾佢咁樣講一講，自己嘅信心係有啲打擊嘅。」

面對前輩嘅冷言冷語，袁文傑冇選擇卻步。佢明白喺娛樂圈生存，需要一夥強心臟：「好多謝佢嘅，可能我就因為佢呢句說話，我好多嘅經歷令我能夠呢三十幾年嚟，我四個台都做晒！」結果時間係最好嘅證明，身高冇成為佢嘅阻礙，反而成就咗今日氣場十足嘅「潮偉」，喺娛樂圈屹立三十年依然有價有市。至於當年嗰位前輩，袁文傑話佢而家都係一個好出色、大家公認好演技嘅演員。TVB