許志安謙虛婉拒做《中聲》評判 未有3甲之選：冇人令我覺得突出. 歌手許志安（安仔）昨日（6日）現身TVB，出席公益金活動。久未喺電視城露面嘅安仔一身白馬王子Look現身，精神奕奕兼全程笑容滿面。安仔接受訪問時，講到《中年好聲音》搞得有聲有色，被問到會唔會順理成章落場做評判？安仔立即謙虛婉拒，笑言自己「唔識做評判」。佢解釋話：「因為我自己覺得每一把聲，其實如果發揮到佢嗰個特質就係一把好靚好好聽嘅聲。所以每一把聲都有佢每個人發揮嘅魅力同埋特質，所以我唔係好識做評判，但係唱片公司話其實都可以當係交流。」

安仔被問到《中年好聲音》有冇令佢印象比較深刻嘅參賽者，佢即笑話：「嘩！咁樣好唔公平，個個都好有印象。因為嗰晚好特別嘅，佢哋係揀選咗我嘅歌曲嚟唱。」至於有冇三甲之選，佢話當晚嘅參加者表現平平，「冇一個特別嘅一個人係令到我覺得好突出。」

除咗工作，當然仲有大家最關心嘅老婆鄭秀文（Sammi）。Sammi即將於7月在啟德主場館舉行萬眾期待嘅演唱會，安仔興奮話自己係第一次去啟德睇演唱會：「我覺得呢個係第一次，亦都好期待，好期待嗰個震撼。」被問到會唔會以嘉賓身份去支持老婆，佢大賣關子話：「呢個唔講啦！」雖然未知會否同台演出，但就一定會化身「頭號粉絲」全力撐場：「我覺得係好似party嘅感覺，我個心情係好似party咁去睇。」TVB