陳梓穎住公屋搭巴士 貼地爭港姐

. 無綫年度選美盛事《香港小姐競選2026》首輪面試日前完成，網民選出5大熱門佳麗，其中去年多倫多華裔小姐季軍陳梓穎（Cecilia）憑甜美笑容同大方對答成功入圍，贏得唔少網民喜愛。今年有唔少內地美女參賽，但陳梓穎係土生土長香港人，出身基層住公屋，面試當日更直接搭巴士返屋企，絕對係慳妹一名，同2001年港姐冠軍「屋邨港姐」楊思琦一樣貼地。

面試當日接近晚上8點，參賽者陸續離開電視城，陳梓穎著住白色連身短裙騷美腿，但就換上波鞋，喺巴士站等車。佢報稱喺多倫多讀大學，現回港做行政助理，被問到面試著泳衣會否尷尬時，佢全程笑笑口話「唔好意思，唔答得」，之後巴士到站便禮貌離開，直駛新蒲崗方向。陳梓穎家住新蒲崗東頭邨，落車後箭步回家，等電梯期間低頭睇手機，事後更喺社交網限時動態貼出見記者時嘅相，笑謂：「也是體驗到港媒鏡頭高清圖的真實性了，求大家手下留情。」

過往都有唔少港姐出身自屋邨，包括2001年冠軍楊思琦（住石硤尾大坑西邨）同2010年冠軍陳庭欣（住啟晴邨），未知陳梓穎能否成為今屆嘅「屋邨港姐」冠軍。佢參選華姐期間曾拍片自我介紹，表示自小嚮往踏上選美舞台，難怪佢攞咗多倫多華姐季軍後再接再厲參選港姐。片中佢面對鏡頭從容不迫，仲話自己鍾意畫畫、影相、唱歌同砌Puzzle，又指媽媽係佢嘅「最佳女主角」，遺傳咗媽媽嘅美德。

其他熱門佳麗仲包括：26歲嘅劉爾穎（Helen），由港姐冠軍陳庭欣提名，本身係3料「工展小姐冠軍」，身高173cm成賣點；來自深圳、現職證券公司嘅溫思婷（Cici），喺內地社交網坐擁近200萬粉絲，係「超級網紅」，私下大方展示水着美照，自信同身材都屬高水準；24歲嘅李澤欣（Scarlet）被指撞樣韓國女團IVE成員李瑞；25歲嘅林穎彤（Winnie）係港大應用語言學碩士畢業，現任鋼琴老師兼兼職模特兒，曾係TVB童星，參演過《缺宅男女》同《衝上雲霄》等多部劇集，今次參賽更搵嚟專業團隊打造形象。TVB