【On.cc】黃宗澤帶蘇麗珊涂毓麟去旅行　玩轉內地大西北

藝人黃宗澤（Bosco）之前完成邵氏新劇《風華背後》時，曾在社交網表示：「如果樂小姐帶大家去旅行就好啦！」引起同劇演員很大回響，齊齊轉發支持，今次他先行帶住劇中「龔家」兩個表姐弟蘇麗珊（Cecilia）和涂毓麟（Oscar）出發去內地大西北玩，兼拍攝網上旅遊節目。此行三人去甘肅與青海延線玩足6日5夜，每日用很長車程去不同景點，所以都頗為勞累，更試過為趕行程在巴士上食午餐，猶如學生去旅行般，但各人全冇怨言，還自得其樂。Bosco之前曾到過青海及西寧等大西北地方，對今次行程有不一樣的體驗：「因為上一次純粹拍一啲比較文教性節目，今次是真For Fun，全部都係教人點樣去旅行、去打卡，或者搵一啲新奇刺激嘅玩意，所以今次真係幾特別、幾好玩。」

今次他只帶了Ceci和Oscar去旅行，問怕不怕被同劇的蔡少芬、朱茵、林愷鈴指他偏心，Bosco表示：「本來我第一次的提議係《風華》一家人一齊去，但第一次拍又好似唔敢驚動大家，所以我地呢啲小夥子就先去玩，先試吓個流程，如果下一次再去其他地方，睇吓邊個得閒就嚟。」期間見他們在沙漠上一齊跳舞玩得好開心，問到跟兩位年輕人去旅行感覺如何？Bosco立即抗議：「我都好年輕呀！雖然我係佢哋嘅前輩係事實，但我哋三個都打成一片，只係有需要照顧佢哋嘅時候，我都必須挺身而出，所以都冇分咩前輩。（一齊玩有冇代溝？）我覺得玩得最瘋狂嗰個係我呀！」

他們所到之處都引起哄動被包圍，連去廁所都有上百人包圍住，但Bosco仍然笑容滿面，還跟他們開玩笑，氹得大家好開心，Bosco說：「因為呢度都係遊客區，有好多來自唔同地方嘅人，遇到一啲馬來西亞遊客喺呢度等咗我個幾鐘頭，話想影一張相，盡可能唔影響到工作人員，唔影響到保安嘅負擔，影到咪影，但當然要安全第一，你知道影一張有時候就一發不可收拾，咁你搞到保安工作量提高就唔好啦！」認真為人着想。《風華背後》播出若收視理想的話，Bosco可會再帶台前幕後去旅行慶祝？他立即笑言：「多謝樂小姐！當然如果套劇收得，唔好剩係慶功宴咁簡單，整個短旅行，有錢賺就攞啲出嚟請我哋去旅行，順便拍埋節目，有收益、又可以慰勞員工，係唔係一舉兩得呢？」

今次有幸成為「波總旅行團」其中一員，Ceci十分興奮：「同波總（黃宗澤）一齊去拍嘢非常之開心，佢好照顧我哋，仲照顧埋工作人員，大家去體驗咗好多唔同好玩活動，學到點樣可以用一個好玩方式去做一個旅遊節目。」此行令Ceci印象最深刻的是大家是很有「團魂」，因為大家差不多是廿四小時在一起，睡眠時間不多，車程時間則很多，但大家完全沒有呻過一句辛苦，而Bosco又會關心大家有甚麼需要，所以今次Ceci真的有樂而忘返感覺。至於Oscar今次跟Bosco去旅行拍節目，事前沒有緊張只有期待，因為之前拍攝《執法者們》及《風華背後》時已相處過，感覺似一家人。近日首位港產太空人上太空，Oscar也來湊太空人熱，在青海沙漠以太空人裝扮示人，他解釋：「扮太空人係拍緊波總做導演嘅微電影，但我覺得好似係懲罰我多啲，因為波導第一句就係你瞓低，佢仲扮怪獸襲擊我，但真係好好玩，之前我未嚟過大西北，好多景點都好靚。」

黃宗澤帶蘇麗珊、涂毓麟（右）去旅行。

一齊去沙漠。

黃宗澤同蘇麗珊、涂毓麟打成一片。

睇吓影成點先！

黃宗澤對今次行程有不一樣的體驗。

蘇麗珊對於有幸成為「波總旅行團」成員大感興奮。

涂毓麟事前沒有緊張只有期待。

想食埋一份！

佢哋去到邊都引起哄動被包圍。

連去廁所都有上百人包圍住。

涂毓麟以太空人裝扮示人。