【On.cc】楊千嬅主創全球首個限定快閃店　深圳隆重開幕

樂壇天后楊千嬅主創的全新IP「Am'miri」全球首個限定快閃店，5月15日清晨於深圳靜靜雞「出世」，她現身見「初生女兒」時笑住話：「我等咗咁多年，終於生咗個女，Torres有個妹啦！哈哈！」不過呢次「生女」過程不簡單。本來活動安排在下午舉行，但她到深圳後，已收到風的大批歌迷及市民聞風而至，為免人潮太洶湧難控，臨時被要求改到早上八點半開始。千嬅笑話：「結果我係前一晚要凌晨五點半就起身化妝梳頭，真係生仔都冇咁早起身，哈哈......不過當年生仔，都係一早入醫院準備，所以成朝都有一個準備生個女嘅心情！」

楊千嬅主創全球首個限定快閃店深圳隆重開幕。

呢位「囡囡」Am'miri，原來係老公丁子高Idea。她透露：「其實成件事係丁生嘅idea，希望可以同大家分享生活理念。最終就一齊合作，做咗『Am’miri』出嚟，足足搞咗3年，面世真係好開心。」而擁有淡紫色頭髮、精靈耳同純白翅膀的天使BB「Am'miri」，象徵每個人內心嘅小朋友，溫柔守護初心。千嬅話：「希望『Am'miri』總會喺你最需要嘅時候出現，用溫柔治愈你。」開幕活動中，千嬅分享了「囡囡」嘅五大情緒特質，包括陪伴、愛、接納、包容、勇氣，而她個人就特別鍾意「勇氣」：「心口最緊要有個『勇』字，跌都唔使怕！」

講到最愛嘅公仔，千嬅近年鍾情玩偶：「依家多咗個自己親生女，如果可以出毛公仔，第日就可以攬住個女瞓覺，哈哈！」今次快閃店免費入場，至5月27日，同步為千嬅5月23至24日深圳「春繭」演唱會熱身。對於入場的歌迷表示：「見到千嬅歌裏面一直存在嘅溫柔人格變成真嘅，特別開心，一定要擁有！」千嬅就話：「其實冇諗過話要做到個公仔幾勁幾多人鍾意，只係想同歌迷朋友一齊開心分享。」

楊千嬅人氣高企。

楊千嬅相當受歡迎。