【On.cc】滕麗名分享演藝圈31年心路歷程　談失落金像女配感受

無綫處境劇《愛‧回家之開心速遞》中飾演「熊尚善」的滕麗名接受電台訪問，今年憑電影版《尋秦記》再創事業高峰，並首獲香港電影金像獎最佳女配角提名，她在節目中分享於演藝圈31年的心路歷程，對失落金像女配的感受，她說：「一定會覺得自己有機會，但一啲都無失望，因為成件事已經賺咗。」原來，經歷共18次無綫頒獎禮，包括2000年熱爆全城的《陀槍II》大熱，但最終也落敗，早已睇化獎項，瀟灑看透得失的她絕不介懷：「攞唔到我真係習慣咗，我只係試過1年真係唔開心，就係《陀槍II》陳三元畀人強姦嗰年，因為收視真係好高，我諗就算唔係角色，套劇都應該有份攞獎，嗰陣我真好失望好失望；自此我就同自己講唔會再失望，因為control唔到，睇化。」

滕麗名實力擔當。

阿滕談及90至2000年代，鮮有像其他花旦會為登雜誌封面而影性感相，她承認多次獲邀約，更大爆曾有電影公司以百萬利誘斟她拍三級片：「有記者搵我影，更加有人搵我拍脫戲添，我講真嘅！但我淨係覺得黐線。百萬片酬？係有，但我真係接受唔到，你睇我唔似，但我係好保守嘅人。我當年無參加港姐去參加新秀，就係因為過唔到着泳衣嗰關；我去沙灘都唔會着泳衣。」

由入行至2013年與圈外老公Matthew結婚前，阿滕曾有過兩段圈中情，故一直被形容情路坎坷。她說：「我從來無呢個感覺，我只係覺得自己幾幸運同灑脫，話走就走無問題。」讚她分手後從沒賣慘或斥責前度，她說：「中間發生乜事大家唔會知，亦覺得毋須要申明，只係到某個時刻我要結婚，我要尊重我另一半，唔可以令佢蒙羞，先至回應咗啲唔係事實嘅嘢。同每個人拍拖，都一定有美麗回憶，如果搞到核核突突，又何必呢！」

阿滕用「腦霧」來形容自己面對不開心的過去：「啲人話我凍齡，可能就係我唔係好記得啲唔開心嘢。人生有幾多時間，記住啲唔開心嘢好唔抵，我真係腦霧洗得好快。我係戀愛腦，但好快復原，同拍拖年期係唔成正比，哈！」

阿滕坦言，過往的情傷對她絕無陰影，因學品酒認識圈外老公Matthew，二人交往了兩年便於2013年結婚至今。至於13年婚姻的保鮮秘訣，她說：「我哋無停過，日日玩低能嘢。一入門要衝埋攬攬、又會扮玩貓跳，即使朋友響度，我都唔會介意。入門口都會好似隻狗咁撲上去佢度，我哋無掩飾，最緊要表達自己，大家唔會收收埋埋；兩公婆最好溝通方法，就係能夠響對方面前呈現一個小朋友嘅形態，即代表對大家有安全感。」

至於婚後未有生育是否遺憾，她說：「結婚頭一年係想過有，只係好短暫試過，但無遺憾。每樣嘢都有優點同缺點。我係一個控制狂；如果我有小朋友，佢會好大壓力，都未必係一件好事。」

滕麗名演技備受肯定。