究竟係活塞嘅死亡力量，還係騎士關鍵時刻腳軟，不得而知。

今場騎士整隊都受制於活塞嘅防守及氣勢，詹士夏登（James Harden）上仗已去得甚盡，今場果然有影響，23分4助攻卻有8失誤，而米曹（Donovan Mitchell）嘅20分就來自20射6中，只得3次助攻，佢哋加上0分嘅舒路達（Dennis Schroder），三人命中率僅為32.4%。

至於活塞就係人人有功練，要讚碧卡斯達夫（JB Bickerstaff）未有更改正選陣容，等復出嘅鄧肯羅賓遜（Duncan Robinson）改打後備，結果佢攻入14分，連同奇兵列特（Paul Reed）嘅17分，以及利華特（Caris LeVert）同薩沙（Marcus Sasser）加埋來嘅17分，喺呢個關鍵時刻，理論上用人會越來越少，甚至用六個半人都唔出奇，但係今場活塞用咗九位球員（唔計垃圾時間），有d問題較大嘅如史超活（Isaiah Stewart）因為打唔過雙塔就棄用；有d打得好嘅如列特（Paul Reed）就繼續上。活塞嘅後備比較單一功能，有攻無守或有守無攻，結果啱啱好補上咗正選嘅弱點，當然要調動恰當。

Cade有21分8次助攻，鬧到爆嘅杜倫（Jalen Duren）亦有15分11籃板3封波，六人得分雙位數，加上一個9分，一個8分，活塞絕地下作客贏波，追平3-3，搶七將會返回主場再戰。

兩隊鬥心和體力都有差距，最終騎士錯失咗晉級良機，艾堅遜（Kenny Atkinson）仲有冇方法過關？兩支球隊首圈同樣搶七出線，只係騎士已錯過最好嘅時機，睇來形勢已完全重返活塞身上。

p.s.騎士韋迪（Dean Wade）跌得好慘，佢哋主場嘅擦地板哥哥賽後都要打屁股。

文章擇自- 仙道彬手記🏀