鄭俊弘宣布與無綫結束24年賓主關係：感覺似離家出走.藝人鄭俊弘（Fred）2001年新秀比賽奪得亞軍入行，效力無綫長達24年，今日在社交網宣布離巢。

Fred晒出大量工作照，並發長文分享在無綫多年來的點滴：

「二十四年。呢段時間，我一直視TVB為我嘅家。當年一中學畢業，我就行入咗呢對大門；果（嗰）時嘅我，只係一個熱血多過經驗、對世界充滿好奇嘅細路。而今日，呢個章節終於要畫上句號。呢度有過好多美好嘅時光—走廊入面嘅笑聲、變成家人一樣嘅戰友、仲有我哋全情投入去演活每一個觸動人心故事嘅夜晚。當然，亦有過艱難嘅時刻—疲於奔命嘅勞累、自我懷疑、仲有嗰啲覺得自己做得唔夠好嘅瞬間。但無論經歷緊啲咩，我從未停止過對呢段旅程之感激。」

「多謝每一位教導過我、信任過我，或者只係喺收工後陪我食過一餐飯嘅監製、導演、幕後同事同拍檔。多謝每一位陪住我成長、為我歡呼、甚至同我一齊流淚嘅觀眾-你哋先係令我堅持落去嘅動力。 」

「離別係奇妙。一方面，我覺得自己好似第一次離家出走咁；但另一方面，我知道我並無放棄講故事，只是到外闖闖。我唔肯定未來會係點，凡事都樂觀一點，充滿希望。因為當年嗰個17歲嘅細路仲喺我心入面-準備好再次學習、再次成長，去搵一個新嘅方式同大家連繫。多謝 TVB，承載住我工作生涯嘅第一個二十四年。亦感恩同多謝每一位曾經同我同行嘅人。歡迎新嘅開始，歡迎大家嘅合作，歡迎新挑戰。」

TVB