藝人陳瀅、林夏薇、陳山聰及林盛斌近日到訪馬來西亞，相隔3年重遊舊地的陳瀅自爆被當地美食吸引，活動完結即跑去「搵食」獎勵自己，林夏薇則唱出當地取景劇集的主題曲，勾起大家回憶殺。

女神陳瀅、林夏薇（薇薇）、陳山聰及林盛斌（Bob）日前現身雲頂，為當地開設的新型商場宣傳造勢，更趁機舉行粉絲見面會，吸引大批粉絲到場追星，場面墟冚。兩位靚女陳瀅及薇薇不約而同以一身白長裙現身，盡顯仙氣，而Bob除擔當主持外，更用特別雄厚的聲線高歌娛賓，令現場充滿笑聲。

見面會上薇薇與山聰先後獻唱，前者清唱馬來西亞取景劇集《單戀雙城》的主題曲《很想討厭你》，山聰則唱出《愛你一萬年》及《海闊天空》，期間不斷比心，走下台與粉絲近距離接觸。至於陳瀅眼見粉絲十分熱情，即場大獻舞技，成功炒熱全場氣氛。

談到今次馬來西亞之旅，陳瀅昨受訪時表示：「我真係好耐冇去過當地，啲粉絲足足等咗我3年。今次粉絲見面會係我哋嘅重聚，大家都好熱情，專程上嚟雲頂一齊玩。我本身好鍾意當地食物，完咗騷第一時間就去『搵食』，好開心食到美味嘅榴槤當獎勵自己，真係寓工作於娛樂。」

至於山聰則表示：「我哋喺台上唱歌，又同大家玩遊戲。呢個新式商場好適合一家大細去玩，真係可以諗吓遲啲帶囝囝去放暑假。」Bob事後於社交平台晒出大合照，且留言：「衷心感謝邀請，同現場咁多位馬來西亞嘅觀眾一齊玩，一齊開心，希望大家有個愉快嘅中午，好期待快啲再見到大家。」