【On.cc】草蜢演唱會邀「軟硬天師」做嘉賓　最強合體掀回憶殺

組合草蜢的第5場紅館演唱會《THREE IN LOVE草蜢演唱會2026》，捧場的圈中朋友有鄭伊健、鄺美雲、鍾鎮濤等，與全場觀眾玩人浪、起身跳舞大合唱。表演嘉賓則是同是經典組合的軟硬天師，打造了一場復刻「草蜢森巴大戰軟硬Fans演唱會 2012 GHVSSH」，軟硬天師更以20年前一黃一紅戰士look登場掀起集體回憶。不過兩人的身形變成XXL版，草蜢幾乎笑到講不出聲：「十幾年無見，肥咗喎！」

草蜢勁歌熱舞。

2012年時，草蜢和軟硬破天荒於紅館舉行一連12場以對決形式上陣的《草蜢森巴大戰軟硬Fans演唱會 2012演唱會》，期間更攜手推出精選碟《軟硬草蜢》。被喻為「史上最強合體」，當年對決由軟硬險勝，但相隔14年，兩對組合再戰紅館，軟硬將草蜢《三分鐘放縱》加入首本名曲《老人院》、《廣播道fans殺人事件》和《川保久齡大戰山本耀司》歌詞，但蔡一傑（傑仔）「投訴」軟硬：「雙腳無離地跳舞揸流攤」，蔡一智（阿智）更取笑軟硬：「跳『落地生根舞』。」

「硬天師」林海峰反擊：「你哋係『跳舞組合』，我哋係『無跳組合』！」草蜢再跳唱軟硬的《叱咤勁歌金曲》迎戰，非常精彩。同當年一樣，以現場歡呼聲評分，雖然主場草蜢明顯大勝，但軟硬出茅招亂噏賽果，非常爆笑。

草蜢送上泳褲給林海峰，預祝他三項鐵人比賽成功，而送葛民輝孖煙囪底褲。林海峰爆小秘密，原來1993年軟硬宣傳《廣播道Fans殺人事件》時的「潮爆板仔look」，其實是抄草蜢《三分鐘放縱》MV造型：「睇電視見到，嘩，咁型，但唔襯你哋囉！我即刻叫阿葛（民輝）跟住搵。」結果獲當年板仔界鉅子BFD日籍老闆贊助，軟硬成為潮流指標，林海峰多謝草蜢啟發，揚言他們任何時候要「大戰」，軟硬隨時奉陪，台下Fans立即歡呼，期待草蜢再乘軟硬開騷。

軟硬一唱一和，將近日草蜢三子在演唱會台上講的深情說話，重新組裝成軟硬模式，全場笑聲不絕。林海峰說：「你哋三個話希望下一世都做兄弟，點解無預我哋兩個？如果唔預埋我哋，就無辦法同你哋『大戰』！」又對傑仔說：「人生嚟到呢個地方，要將張畫紙畫到最靚。」葛民輝扮傑仔語氣：「如果軟硬有張畫紙，一定請埋草蜢一齊畫！」傑仔說：「我哋張畫紙都一定有你哋軟硬份嘅！」

之前阿智台上多謝舊同學蘇志威（蘇老闆），林海峰說：「我都多謝我嘅同學葛民輝，我哋都係屋邨大，無諗過我哋呢個組合都可以堅持到40年！」蘇老闆質疑可有40年？葛民輝說：「四捨五入！」又說：「雖然我哋兩兄弟成日吵吵鬧鬧，但係我哋永遠都係一體！」林海峰拉住傑仔說：「將來無論你哋三個邊個走先（草蜢齊聲『啋』），我都會走先，因為我慣咗早瞓。如果草蜢下一世有場紙嘅話（紅館開騷入場紙），我哋軟硬下一世都會做兄弟，陪你哋繼續玩落去！」五子手搭手結盟，場面感人。但阿智突然對軟硬說：「我想講⋯⋯我點都唔會着你哋件衫！」全場爆笑。接着他們合唱草蜢的《朋友》和軟硬的《好兄弟》混合版，全場High爆！

草蜢施展渾身解數。

草蜢歌精舞勁。

軟硬天師做嘉賓。

大放笑彈。