陳煒《正義女神》奪視后呼聲高：希望攞到 自嘲「白紙」感激鄭則仕啟蒙.TVB劇集《正義女神》即將迎來大結局，入行30年嘅陳煒憑劇中飾演大律師「高淑樺」，其「教材級」眼神戲同「大義滅親」內心戲，獲封視后大熱。佢接受訪問時坦言希望有機會奪獎，更自嘲初出道係一張「白紙」，全靠Kent哥鄭則仕啟蒙令演技開竅。除咗恩師，陳煒仲分享老公喺佢休克時送藥送粥嘅窩心故事。從白紙到封神，陳煒嘅30年，戲內戲外同樣動人。

陳煒喺《正義女神》飾演大律師「高淑樺」，劇中有多場法庭戲兼專業對白，佢話因為牽涉唔同案件，花咗好多前期功夫準備，仲話同佘詩曼有唔少對手戲，包括「口戰」、「互啤」等場面。今次拍攝仲有好多後生演員，佢笑言：「一定要做好，唔可以衰俾新演員睇，要做一個榜樣。」劇中佢同飾演囝囝「高成彬」嘅劉倬昕嗰場法庭崩潰戲，被指係「封神之作」。陳煒大讚劉倬昕演得非常好，透露幾年前已認識對方，讚佢好叻、係運動員又修讀犯罪生心理學，演繹上有好多諗法。

入行30年，陳煒2018年憑《宮心計2深宮計》奪得「最受歡迎女角色」，但同「最佳女主角」多次擦身而過。《正義女神》播出後，網民紛紛希望佢今次能夠奪得視后。問到恨唔恨攞獎，佢話：「我覺得有呢個遊戲就應該要參與，每一次嘅作品都希望盡力做好，遇到適合自己嘅劇本，更加開心，信心都大增。我好鍾意《正》嘅劇本，希望有機會得獎。」從亞視到TVB，陳煒浸淫多年嘅成熟演技已得到大眾肯定，不過佢話初時由選美到做演員，係一張「白紙」，一竅不通，幸好有不同前輩教導，當中最深刻嘅係Kent哥鄭則仕：「同佢合作咗3套戲，由亞視年代到而家。喺佢身上學到好多，佢好肯身教，會特登做俾你睇，令我成長好多。而家我每部戲出街，佢都會睇完之後俾好多意見，係一位良師益友。」

感情方面，陳煒2022年與醫生陳國強結婚，婚後依然甜蜜。佢坦言當年老公係以誠意打動佢，回憶起一次拍戲時突然休克：「拍戲時突然休克，成身冇晒力。當時身邊冇乜醫生朋友，就打俾陳醫生問我嘅狀況，然後佢放lunch時，特登攞藥同買粥送上嚟俾我。嗰一刻真係好打動，自己單身咗好多年，突然有人咁樣關心，係好心動。」佢仲笑言老公係自己最大嘅粉絲，所有作品都會追看支持。

TVB