古天樂被爆「秘婚生子」林淑茵遭粉絲圍攻 換頭像無聲控訴：其他雜音一律唔回應.古天樂近日被捲入「秘婚生子」風波，傳聞源頭來自部分「古宣CP」粉絲嘅不滿情緒。早前古天樂與宣萱因電影版《尋秦記》宣傳及推出合唱歌《無時空之戀》，令「螢幕情侶」再度成為焦點，卻引發部分激進粉絲幻想破滅。有網民喺Threads上聲稱古天樂其實已經與一名圈外林姓女子秘婚超過十年，甚至育有一子，隨即引爆網上討論。

網友迅速化身「網絡金田一」，將矛頭指向曾於千禧年前後活躍影壇嘅女演員林淑茵（Gloria Lam）。林淑茵喺1999至2000年間參演過《街女》、《黑血》、《山村老屍》及《人肉玩具》等電影，其中喺《山村老屍》中飾演被鬼上身的少女，當年清純形象令人印象深刻，後來淡出幕前。雖然已淡出演藝圈多年，但林淑茵同圈內人關係密切，佢同草蜢成員蔡一智太太周雪芳係好閨密，袁詠儀亦曾點讚佢嘅社交動態。有網民仲指出佢嘅外貌同洪卓立前女友劉沛蘅有幾分相似。

粉絲從林淑茵嘅社交貼文中搜羅多項「巧合」作為「證據」，例如二人曾出現喺同一場合嘅大合照中；古天樂住貝沙灣，林淑茵嘅貼文也經常喺貝沙灣打卡；古天樂喺曼谷有公司，林淑茵則頻繁飛往泰國，更稱當地豪宅為「sweet home BKK」；甚至有網民整理出二人在2019年至2025年間曾於相同時間點現身成都、倫敦、康城等地。此外，林淑茵曾分享一張將相中人樣貌全部遮蓋嘅聚會照，寫道「最愛都在身邊」，其中一名男士嘅衣著被指與古天樂嘅Polo衫相似；古天樂監製嘅《明日戰記》上映時，林淑茵曾留言「特別的 proud of U」。

種種「巧合」令大批瘋狂CP粉深信不疑，紛紛湧入林淑茵嘅社交帳號進行洗版式攻擊，痛罵佢破壞「古宣CP」。最終，林淑茵疑因不堪網絡暴力，將帳號轉為私人，更將頭像換成一張「精神健康熱線」嘅截圖，被外界解讀為對網絡欺凌最沉痛嘅無聲控訴。

多名圈中女星亦曾因此遭殃。有指早前鄭秀文喺聚會上同古天樂正常互動，被激進粉絲圍攻，最終被迫刪除帖文；唐詩詠訪問古天樂同樣被批評；郭羨妮更因喺金像獎被古天樂攙扶落樓梯，而遭粉絲辱罵。

面對愈演愈烈嘅風波，古天樂日前出席活動時終以一句霸氣金句回應：「工作同宣傳嘅嘢我會盡力做好佢，其他以外嘅雜音，一律唔回應。」既冇承認亦冇否認，外界解讀為以不變應萬變。

古天乐被传隐婚生子林淑茵疑因被传与古天乐隐婚换头像