蔡思貝想自組公司做老闆 親解有冇被周星馳鬧：佢慷慨分享想法.蔡思貝、李炘頤（Alina）、俞可程、倪樂琳、宋宛穎、濱口愛子、伍允龍及女友李蔓瑩等昨晚（28日）出席電影首映。着上旗袍嘅蔡思貝身形弗爆，話好開心可以出席，因為呢部戲係佢細個最鍾意嘅電影之一。談到早前到尼泊爾做慈善探訪，蔡思貝話童婚問題最令佢心痛：「見到一個好乖嘅小朋友，為咗爸爸開心寧願冇得返學，然後就要喺人哋屋企做家務，冇咗自己一生。」佢本身有助養兒童，此行再助養咗一個五口家庭，希望呼籲社會募捐。

早前正式離巢無綫嘅蔡思貝，透露有幾部電影同舞台劇合作洽談中，問到會唔會自組公司，佢話有呢個想法，但需要請教有經驗嘅人。講到想唔想長駐做星女郎，佢即刻自薦：「星爺係電影界嘅神，同佢合作一次唔夠喉，希望佢發掘我更多可能性。」問有冇俾星爺鬧過，蔡思貝賣口乖：「我唔會覺得係畀佢鬧，係佢好慷慨分享想法俾我知，等我可以好好發揮。如果導演唔肯溝通，我反而會唔開心！」

俞可程着小背心現身，佢話電影首集上映時自己未睇過，但上網搵咗短片理解故事。佢自爆入行前做測量師工作時遇過充滿氣場嘅上司，試過犯錯被責難：「做錯嘢個客鬧公司，上司鬧我，有啲唔開心，惟有從錯誤中學習。」本身已忙於《女神配對計劃2》，點分配時間？俞可程話：「我就係鍾意忙。」若將來喺節目搵到男友，會擺7成時間拍拖、3成工作。佢又話身邊有男性朋友想報名參加，有人鍾意郭珮文幽默同靚，亦有人鍾意阮嘉敏鍾意做家務。佢透露收到不少追求者邀約食飯嘅短訊，笑言：「有啲話想參加但唔想出鏡，不如私底下食飯。但唔得，睇定啲先！」

早前獲MIRROR成員邱士縉（Stanley）求婚嘅李炘頤（Alina），透露婚禮籌備得差唔多，但未揀心水婚戒，笑言自己「大頭蝦」成日遺失物件，唔打算揀太貴重款式。佢話已請咗6位好友做姊妹團，包括圈中人。講到早前喺巴黎擺烏龍，原本想訂高級餐廳同3位好友食晚飯，點知錯手訂咗19位變成「包場」，佢笑指係人生最蝦碌事件：「錢好辛苦搵返嚟㗎！自己衰自己畀返。」Stanley笑佢「又係咁？都係你性格」，不過都照樣要畀錢。

濱口愛子對於老公吳業坤離開TMG並考慮自組公司表示支持。提到老公話要開源節流出歌，會唔擔心影響生活質素？佢話：「唔擔心，佢會好努力工作。（老公減家用？）唔會。」早前佢拍片話想返日本，佢澄清只係想返去睇櫻花，唔係唔適應香港生活：「我好鍾意香港，Enjoy香港生活。」對於生B計劃再度延遲，佢話希望先努力學習獨立，融入香港生活並努力工作，所以唔急於生B。

TVB