周嘉洛親認曾食煙扮梁朝偉：試過唔鍾意 否認係「煙鏟」已戒除.周嘉洛近年憑《愛·回家之開心速遞》「金城安」一角入屋，之後喺《羅密歐與祝英台》、《正義女神》等劇集中演技備受讚賞，形象亦由「孱弱廢青」漸漸轉型，近日更操肌變身「筋肉猛男」。不過喺Threads上有網民爆料，指曾在TVB工作時發現佢係煙不離手嘅「煙鏟」。周嘉洛日前（25日）出席《正義女神》宣傳活動時接受《香港01》訪問，大方回應事件。

周嘉洛直認初入行時曾經食煙，但好快就戒咗，甚至稱不上係「煙鏟」：「我係有試過食煙，但已經係過去嘅階段。嗰時後生，會覺得好想試吓係咪真係好似電影中嘅梁朝偉咁樣，好型咁樣。我都好慶幸自己試咗，試完知道自己唔鍾意嗰個style，我都係鍾意健康啲嘅感覺。」佢澄清自己絕對冇煙癮：「如果係煙鏟嘅話就會好有煙癮，但我冇。」記者現場嗅聞佢雙手，亦冇發現煙味。

講到操肌變大隻，周嘉洛話因為想身體健康而開始做運動，操肌兩個多月已見成果。除咗一星期幾次重訓HIIT，仲要配合飲食，食雞胸、蝦、牛、三文魚同西蘭花，澱粉質就揀蕃薯等天然食物。佢話雖然訓練辛苦，尤其收工後再去健身：「但換嚟嘅快樂係持久同健康。有時收工好攰，但見到班兄弟，個感覺好relax，舒服過喺屋企。」TVB