周柏豪相隔14年再現身馬場 曾遇狂迷敲酒店房門：諗過戴假髮出街.周柏豪今日（26號）到沙田馬場擔任開幕表演嘉賓，對上一次出席馬場活動已經係2012年，當時同官恩娜一齊。佢笑言睇返當年嘅相覺得自己好「嫩口」，皮膚都緊緻啲，而家多咗歷練變得更成熟，仲話更鍾意而家嘅自己。今日佢帶埋長輩同一對子女入場，但小朋友未成年只可以留喺會所玩。問到會唔會想俾仔女學騎馬，佢話：「太太想，而家好多人學，又問我點解唔學，覺得好有型。睇將來有冇機會接觸。（做馬主？）現階段未有計劃，要養家，冇太多留意。」

周柏豪現時忙於喺內地做巡迴見面會，預計做到出年。佢話每到一個新地方工作都似放假，反而喺香港湊小朋友更似工作。復活節假期一家人去咗上海旅行，一行十幾人得佢一個壯丁，一個人拎14個人嘅行李。

講到狂迷，周柏豪話同家人旅行時會盡量低調，唔整髮型，但有時都會被認出。佢曾經問太太點解，太太話認得佢背影或身形，令佢一度諗過要唔要戴假髮出街。佢話粉絲認出佢想合照都冇問題，只要唔好影到家人就得。佢又透露遇過最瘋狂嘅狂迷會敲酒店房門，甚至打開父母座駕嘅車門叫老爺奶奶：「我唔建議咁做，我好感謝佢哋鍾意我父母，但咁做好危險，又會嚇親老人家。」