許鞍華自爆當年拍《投奔怒海》罵哭關錦鵬 歎電影市道疲弱預算太低局限題材.許鞍華導演、關錦鵬導演、劉天蘭及李樂詩博士昨晚（25日）出席香港流行文化節2026「奇幻電影之旅」《撞到正》4K數碼修復版全球首映禮，楊凡導演、吳煒倫導演與美術指導雷楚雄等到場支持。許鞍華與關錦鵬作為《撞到正》導演及副導演，喺台上回憶當年拍攝點滴，許鞍華更自爆曾經鬧喊關錦鵬嘅往事。兩人受訪時許鞍華憶述：「當年《投奔怒海》連戲拍咗幾個禮拜都拍唔到，車出車入都拍唔到，有啲炆憎所以先鬧人。」關錦鵬就坦言當年自己做錯事先被罵，澄清許導其實極少鬧人，一向善待演員同工作人員。

許鞍華笑言：「我發火嘅事唔係好記得，無論人對我衰、我對人衰都唔記得，亦冇演員會令我炆憎。」關導就透露許鞍華習慣將演員拉到一邊細聲指導。許鞍華話自己並唔渴求演員聽話：「演員有創意、做出嚟好過我想像先重要！蕭芳芳、葉德嫻同梅艷芳表現都能夠超越想像。」講到《撞到正》女主角兼監製蕭芳芳，關錦鵬坦誠自己係小影迷，能夠喺鏡頭後親眼睇住蕭芳芳表演係好難得嘅機會：「但我冇追星，冇叫佢簽名。」

談到近年電影市道疲弱，不論製作資源同票房收入都大減，許鞍華認為由於預算太低令題材有限，製作規模過細嘅話觀眾未必鍾意。關錦鵬就提出新導演嘅故事傾向較為個人化，勸導話：「唔好太自我沉溺個人風格，要思考係咪感動到觀眾。」對於電影投資預算大減，關錦鵬就話要「睇餸食飯」，喺製作費有限之下，演員好似鄭秀文咁，喺《流水落花》都以零片酬支持香港電影。