十大中文金曲｜吳業坤奪金曲獎宣布離開TMG 早前曾被公司官網除名

「第47屆十大中文金曲」頒獎音樂會今晚（24號）假東九文化中心舉行，吳業坤憑《愛情求生案內書》奪得十大中文金曲獎。佢今晚以全新形象亮相，除低咗招牌眼鏡、換上淺色西裝上台領獎，估唔到新形象背後仲有新動向——佢喺獻唱前突然宣布：「今晚係最後一次以TMG歌手身份出席，希望日後繼續唱歌畀大家聽。」正式宣告離開所屬唱片公司TMG（TVB Music Group）。

其實坤哥離巢早有端倪。早前TMG推出賀年歌《迎春祝福樂年年》MV時，身為「TMG一哥」嘅吳業坤竟然冇份參與，甚至連TMG官方歌手名單都被悄悄除名，當時已惹來離巢揣測。今年2月就有網民發現坤哥喺TMG官網嘅名字同照片消失，當時佢仲搞笑回應話可能係「勞資糾紛」。到4月初，坤哥受訪時曾承認合約會喺今年內屆滿，但強調4月24日仍會以TMG歌手身份領獎，估唔到今晚真係喺頒獎台上親自宣布告別。

早前坤哥亦曾喺社交平台自嘲，有網民話想搵3、4線歌手去婚禮唱歌，坤哥竟然現身留言：「5線得唔得？」，似乎對自己喺樂壇嘅定位早有感悟。

雖然坤哥宣布離開TMG，不過翻查TVB官網，佢依然係TVB藝人，往後會繼續拍劇，演藝事業未受影響。