李君妍入行16年陷事業低潮憂被淘汰 自爆敲門爭機會遭當面起身閂門冷待.無綫藝人李君妍於4月10日現身沙田，出席連鎖健身中心的品牌活動。入行至今已16年的她，接受《香港01》訪問時坦言，近期演藝工作量大幅縮水，正陷事業低潮，內心滿是迷惘，更早已考取健身教練牌，轉行教健身為自己鋪好後路。

李君妍透露，自今年1月拍完上一套劇集後，自己的工作量就開始急跌，如今只剩零星的活動通告。她直言，眼見公司近年劇集製作量持續減少，營運重心亦轉移到網絡平台，對於早已習慣傳統電視台拍攝模式的藝人而言，帶來的衝擊相當大。

她感觸道：「其實我自己幾年前已經睇到個前景，所以早就考咗教練牌同香薰治療證書，預先準備好，萬一之後真係有很長一段時間冇工開，都有第二手準備。而家教練工作一個禮拜都有五日，都好開心教小組班，仲會一對一幫人做痛症治療。」

被問到有沒有主動向監製「敲門」爭取演出機會，李君妍坦言自己向來性格內向，以往也曾嘗試多回公司走動、甚至趁節日送上問候，只為增加曝光機會，奈何有時只會換來對方的冷淡對待。

她更憶述了一次相當尷尬的經歷：「試過有一次我在走廊，同房入面的監製有眼神接觸，本來諗住入房敲門打聲招呼，點知可能對方見到我，已經猜到我想做什麼，居然即刻起身閂埋門。可能佢當時唔想被人打擾，手頭上有嘢忙住唔想傾偈。」雖然當下難免覺得受挫，但李君妍也表示完全理解：「我都冇話唔開心，因為我知道佢性格本來就係咁。亦都明白，我主動上門，人哋唔一定要應酬我，佢哋平時做嘢真係好忙，我都好明白。」

經歷過種種挫敗，李君妍坦言自己以後都不會再主動「敲門」：「之前都試過好多次，敲完門都係一樣結果。其實你都明㗎啦，監製如果想用你，早就用咗啦，冇理由唔認得我哋呢班舊人。有時可能真係我哋不夠主動、不夠『騷』，公司有個藝人狀態表擺喺度，邊個得閒、邊個冇工開，同事行過都見到，正常都會用吓，但偏偏就冇。咁可能真係未有合適的新角色，亦都而家個圈真係比較鍾意新面孔。」

李君妍坦言，自己同無綫的合約仍有幾年時間，但對於未來的演藝路，始終充滿不安。她直言，觀察到如今圈內愈來愈偏好新面孔，好似她呢啲入行16年的「老將」，對觀眾同製作團隊而言，新鮮感早已慢慢流失。

「我哋呢啲舊人，底細早就俾人摸得一清二楚，仲有冇得發揮，我覺得真係睇命水。又或者睇你自己肯唔肯轉變，有冇啲新嘢可以俾人睇到，要自己主動去發掘自己，騷出另一面俾人見。」被問到會不會擔心被行業淘汰，她毫不諱言：「我覺得會㗎。所以我而家先積極另謀發展，盡量喺運動方面再做突破，睇下可唔可以重新塑造一個形象出嚟，又或者搵到另一個方向，俾大家重新留意到我。」TVB