有時間可以講返聯賽盃決賽，哥迪奧拿破天荒帶領曼城第五次奪得該項賽事錦標，睇怕其他球隊要打破呢個紀錄未來都唔係咁容易。而除咗係領隊間嘅師徒對決之外，同時都係兩隊後輩龍門之間嘅較量。結果有點尷尬嘅數據，阿仙奴守門員基柏喺連同當晚嘅三次聯賽盃決賽全部都輸波告終。而最關鍵係佢喺下半場處理曼城傳中波出現「黃右手」，令曼城左閘嘅奧尼利「執雞」打開紀錄，呢個打擊對阿仙奴嚟講都幾大。而呢位21歲小朋友4分鐘後上演梅開二度，毫無疑問成為咗曼城捧盃嘅主要功臣。至於球隊其他球員方面，杜古依然係最活躍嘅一位；守門員查福特嘅表現更加可圈可點。

阿仙奴尾段非全無機會，後備上陣嘅卡拿費奧利係佢哋最具威脅嘅一位，可惜皮球擦柱而出；另外加比爾謝薩斯嘅頭槌亦都過唔到門楣。

Carabao Cup聯賽盃決賽阿仙奴0-2 曼城