紐約人捧盃唔關伸哥事｜馬刺輸經驗期待再成長先恭喜紐約人，馬刺今場的確輸得心服口服。打波，當然唔可以姓賴。年輕嘅馬刺上仗雖力克雷霆，但今日完全發揮唔出擅長嘅快速籃球，加上籃板幾乎被米捷爾羅賓遜（Mitchell Robinson）控制，第四節關鍵時刻，越急越亂，結果就賠上咗冠軍。紐約人改聘麥克布朗（Mike Brown）時引來好多人質疑，但睇佢今場用上兩大奇兵，先係米捷爾羅賓遜嘅籃板，以及第三控衛泰萊高歷（Tyler Kolek），兩位都交足功課，係改變戰局嘅重要人物。呢個冠軍，代表咗紐約人喺新時代嘅第一步，要打出比上季飲恨東決嘅籃球，正需要呢種眾志成城嘅團隊精神。祖殊赫特（Josh Hart）有錢可以買錶，馬刺就要好好思考，陣地戰應該點樣打，始終快攻籃球難以喺季後賽發揮；今日未有Hack MR亦有點令人意外，米治莊遜（Mitch Johnson）既然識得學普波域治嘅超部第六人部署，咁hack人嘅手段，其實都應學習。//事實證明，就算馬刺有「外星人」雲班耶瑪（Victor Wembanyama），最後都係不敵伸哥嘅發功😄，就算前三節有優勢，但到關鍵時刻因為經驗不足，太過手緊，俾紐約人把握機會，以124-113贏得隊史嘅第一座NBA盃，而謝倫賓遜（Jalen Brunson）亦以25分8助攻成為MVP，至於紐約人得分最高嘅球員就係安倫奴比（OG Anunoby），既攻且守嘅佢有28分。雲比繼續後備上陣，憑第三節爆發，全場有18分，戴倫夏柏（Dylan Harper）就有全隊最高嘅21分，老土講句，今次輸波對馬刺絕對係好事，因為佢哋會繼續成長，失敗嘅傷痛會令佢哋行得更遠。今次嘅NBA盃決賽，既係球季第一個錦標，亦係兩支努力重建發隊嘅中期成績表。紐約人喺2013年後，連續七季無緣季後賽，到2020-21球季雖喺眾將努力下重返戰場，但首圈已被鷹隊踢走，到2022年從小馬手上搶過謝倫賓遜後，先一步一步喺東岸有一席之地，到唐斯（Karl-Anthony Towns）來投，一前一後重心成型。至於馬刺亦經過痛苦嘅重建過程，一班年輕球員配上如迪羅辛（DeMar DeRozan）等星將，仍係這麼近那麼遠，直到先後選上雲班耶瑪同埋卡斯圖（Stephon Castle），先慢慢打出隊形。管理層亦毅然加速，先交易來霍斯（De’Aaron Fox），再選上戴倫夏柏，加上中生代同夏理遜班尼斯（Harrison Barnes）及干尼特（Luke Kornet），令人期待佢哋可以喺幾年內挑戰冠軍。//-------------------------------------------文章擇自- 仙道彬手記🏀