港姐袁文靜教書諗定後路 施宇琪同無綫攤牌唔做演員.應屆港姐亞軍施宇琪、季軍袁文靜（Jane）今日（15/11）現身沙田馬場出席活動。日前，施宇琪日前在社交平台拍片宣布轉換跑道不做演員，而是向主持及財經主播方面發展，袁文靜又在社交平台宣布做回「老本行」教書，引人关注。今日袁文靜接受訪問時表示：「其實我想教書同做藝人可以平衡，好多時間上班都係10點到12點，咁之前嘅時間就可以做自己事，所以就想教返書，因為我覺得做藝人好唔穩定，自己想為自己打算教返書同做生意，始終做藝人你係唔知下一個工作係乜，做主持還是做演員，變咗好難Keep住。（覺得行演員呢條路好迷惘？）而家係有好多活動，呢一年就唔會咁迷惘，但下一年就唔知，咁所以而家要諗之後嘅打算。」施宇琪：「因為本人好鍾意財經呢一方面，而我係放唔低同埋我係好想做，我個心同我講，我要做，而我一決定咗，我就會勇往直前。」被問到分享影片前無綫是否知情？施宇琪表示：「唔知㗎。但我有打咗俾經理人，問過佢我可唔可以去TVB財經台，我係有同佢商量過，但唔知可唔可行，但我要讀咗書先，讀完專業啲，咪會有多啲機會。（點解唔想做演員？）因為唔夠靚，同埋我係好易肥，要我Keep一個藝人瘦嘅身材，我每日只可以食800卡路里。變咗我做唔到藝人嗰種瘦，何必呢？我又咁鍾意食嘢。（主播都要靚！）咁我又唔需要咁瘦嘛，我而家咁嘅狀態可以做主播，但就做唔到演員。（演員有唔同角色！）我覺得難啲囉，我覺得做人要往自己擅長嘅嘢去進發嘅。我擅長財經，又擅長吹水。屋企人都好支持我，只要我唔殺人放火佢哋都好支持我。」