【On.cc】佘詩曼氣場盡現　勸谷婭溦講好廣東話先做主播由三料視后佘詩曼（阿佘）主演的無綫重頭劇《新聞女王2》，開播即好評無數，瞬間掀起追劇熱潮，「Man姐」魅力認真沒法擋。然而，日前出席劇集宣傳活動嘅阿佘，向來出名親民嘅佢竟然罕見動怒，當眾「教訓」劇中飾演「小天」嘅谷婭溦，並直言：「一睇就知你新嚟㗎啦！」原來近期熱衷拍攝短片嘅谷婭溦，日前就趁宣傳空檔搵阿佘拍片互動，片中谷婭溦變返做因廣東話唔標準而缺乏自信嘅實習記者「小天」，並以半鹹淡嘅廣東話訪問道：「Man姐，我想問你……」未料話音未落就畀瞬間入戲嘅阿佘指摘道：「你係咪新入嚟㗎？」並指正道：「我係左邊面個喎！」聞言谷婭溦即尷尬換位置，隨後阿佘亦補充道：「如果唔係（右面頭髮）遮住晒，睇唔到我。一睇就信佢係新嚟㗎啦！」完美重現劇中Man姐氣場。而一旁相當緊張嘅谷婭溦，亦鼓起勇氣向「Man姐」請教做主播，阿佘則嘴角失守回應道：「首先你要講好啲廣東話先。」隨後亦以「Man姐」口脗道：「樣就夠靚了，新聞知識你都有㗎啦，聰明你又有，喺戲入面，但真人我唔知。同埋跟一個好師父，張家妍就係好師父囉！」獲得廂后阿佘讚揚嘅谷婭溦，更係即刻開心到「出戲」，見狀阿佘亦輕拍谷婭溦嘅頭道：「你睇吓，仲需要啲時間呀，加油！」二人互動認真霸氣又可愛！佘詩曼氣質出眾。「Man姐」一嚟就突然發火？原來係「小天」犯咗最基本嘅錯。「Man姐」嘅神仙顏值會畀頭髮遮晒。二人互動認真溫馨。真係霸道又可愛！